१५ असार २०८३, सोमबार
बालबालिकालाई चलचित्र ‘एनिमल’ देखाएको आरोपमा काठमाडौँको एक हललाई कारबाही गरिने भएको छ ।
नयाँ बानेश्वरमा रहेको हल ‘वान सिनेमाज’मा बालबालिकालाई एडल्ट प्रमाणपत्र पाएको ‘एनिमल’ चलचित्रको टिकट बिक्री गरेको पाइएपछि कारबाही गरिने भएको हो ।
‘एनिमल’को सोमवार साँझ ६ः३० बजेको शोमा बालबालिकालाई पनि टिकट बिक्री गरेको पाइएको विकास बोर्डका प्रवक्ता केएल बुढाथोकीले जानकारी दिए । उनका अनुसार हलमा बालबालिका भेटिएपछि हल व्यवस्थापकलाई टिकट फिर्ता गर्न लगाइएको थियो ।
‘एलिमल’ले केन्द्रीय चलचित्र जाँच पास समितिबाट १६ वर्ष माथिका उमेर समूहले मात्र हेर्न मिल्ने ‘ए’ प्रमाणपत्र प्राप्त गरेको छ ।
यसको आधारमा बालबालिकालाई सो चलचित्र देखाउनु गैर कानुनी ठहर्छ । नियम विपरीत बालबालिकालाई चलचित्र देखाएको भन्दै बोर्डले कारबाहीको लागि सम्बन्धित निकायमा सिफारिस गरेको छ ।
उक्त घटनाबारे थप अनुसन्धान गरी सञ्चार तथा सूचना प्रविधि मन्त्रालयमा प्रतिवेदन बुझाउने तयारी भइरहेको बोर्डले जनाएको छ ।
बालबालिकालाई ‘एडल्ट’चलचित्रको टिकट बिक्री नगर्न बोर्डले हल संचालकलाई अनुरोध गरेको छ । यदि त्यसो गरेको पाइएमा आवश्यक कारबाही हुने बोर्डको चेतावनी छ ।
