२९ जेठ २०८३, शुक्रबार
‘कमाउने नी हो रमाउने नी हो’ गीतको भिडियोमा सामाजिक सञ्जालमा देखाइएको जस्तो दृश्य प्रयोग नभएको यसको निर्माण टिमले जनाएको छ ।
पुरानो म्युजिक भिडियो छायांकन बेलाको क्लिपलाई लिएर केही दिनयता यसका मोडल प्रकाश सपूतको आलोचना भइरहेको छ ।
उक्त दृश्यमा सपूत र मोडल जुना विश्वकर्मा वसन्तपुरको एक पानी ट्यांकीमाथि नाचिरहेका छन् । उक्त ट्याङकी ‘जीवित देवी’ कुमारीले खानेपानीका लागि प्रयोग गर्ने रहेको र ट्याङकीमाथि नाचेर सपूतले नेवाः सभ्यता र संस्कृतिमाथि अपमान गरेको भन्दै उनको आलोचना गरिएको हो ।
बुधवार गीतको निर्माण कम्पनी शुभारम्भ डिजिटल म्युजिक प्रा.लिले एक विज्ञप्ति जारी गर्दै उक्त दृश्य आधिकारिक भिडियोमा प्रयोग नभएको प्रष्ट पारेको हो । साथै, सुटिङ हुँदा दर्शकहरूले खिचेर सामाजिक सञ्जालमा राखेको भिडियो भाइरल भएको कम्पनीले स्पष्ट पारेको छ ।
आफूहरूले अनुमति लिएर महानगरपालिकालाई नियमानुसार राजश्व बुझाएर उक्त गीत खिचिएको समेत निर्माण कम्पनीले जनाएको छ ।
भिडियोमा समावेश नगरिएको क्लिपलाई लिएर गीतका मोडल प्रकाश सपूतमाथि गालीगलौज तथा लाञ्छना लगाउने कार्य नगर्न समेत कम्पनीले सबैमा आग्रह गरेको छ ।
‘हाम्रो उद्देश्य कसैको आस्था, प्रथा, परम्परा र संस्कृतिप्रति अहित हुने कार्य गर्नु होइन । अञ्जानमा भएको कार्यबाट कसैमा आँच पर्न गएको भएमा हामी क्षमाप्रार्थी छौँ’ विज्ञप्तिमा भनिएको छ ।
‘कमाउने नी हो रमाउने नी हो’ चार महिना अगाडि सार्वजनिक तीज विशेष गीत हो ।
खेम सेञ्चुरी र सुनीता बुढा क्षेत्रीको स्वर रहेको गीतको भिडियोलाई शंकर बिसीले निर्देशन गरेका थिए ।
गीत तीजमा निकै चलेको थियो ।
