०१ असार २०८३, सोमबार
त्रिभुवन विश्वविद्यालयका कुलपतिसमेत रहेका प्रधानमन्त्री पुष्पकमल दाहाल ‘प्रचण्ड’ले विश्वविद्यालयहरूमा राजनीतिक भागबन्डाको अन्त्य गरी मेरिटका आधारमा पदाधिकारीहरू नियुक्त गर्ने बताएका छन् ।
सोमवार दिउँसो त्रिपुरेश्वरमा आयोजित त्रिभुवन विश्वविद्यालयको ४९ औं दीक्षान्त समारोहलाई सम्बोधन गर्दै प्रधानमन्त्रीले यस्तो प्रतिबद्धता जनाएका हुन् ।
‘आजको यो दीक्षान्त समारोह नेपालको इतिहासमा मात्रै ऐतिहासिक बनेन, विश्व इतिहासमा नै दीक्षान्त समारोहको तमाम श्रृङ्खलामा एउटा रेकर्ड हुन गयो। म आज यस अवसरमा त्रिभुवन विश्वविद्यालयबाट नै राजनीतिक भागबन्डाको अन्त्य गर्ने र मेरिटको आधार भीसी लगायतका पदाधिकारी नियुक्ति गर्ने प्रतिबद्धता तपाईँहरूको अगाडि व्यक्त गर्दछु’, समारोहलाई सम्बोधन गर्दै प्रधानमन्त्रीले भने ।
राजनीति दलहरूलाई त्रिभुवन विश्वविद्यालयमा भागबन्डा नभएर मेरिटको आधारमा नियुक्ति हुनका लागि अग्रसर हुन पनि उनले अपिल गरेका छन् ।
‘यसका निम्ति खुला प्रतिस्पर्धामा आउन देशभित्र र विश्वभरि रहेका विज्ञ नेपालीहरूलाई विशेष आव्हान पनि गर्दछु। राजनीति दलहरूलाई त्रिभुवन विश्वविद्यालयमा भागबन्डा होइन मेरिटको आधारमा नियुक्ति हुनका लागि अग्रसर हुन अपील गर्दछु’ उनले भने ।
