एनएनआई–भारतको ६९ औं फिल्मफेयर अवार्ड–२०२४ का लागि मनोनयन घोषणा गरिएको छ । निर्देशक करण जोहर, वरुण धवन र जान्हवी कपुरले मुम्बईमा बुधवार आयोजित पत्रकार सम्मेलनमा मनोनयन घोषणा गरेका हुन् ।

शाहरुख खानले उत्कृष्ट अभिनेताका लागि दुईवटा मनोनयन प्राप्त गरेका छन् । एउटा फिल्म ‘जवान’ र अर्को ‘डंकी’का लागि उनी मनोनीत भएका हुन् ।

रणवीर कपुर स्टारर फिल्म ‘एनिमल’ यो वर्ष सबैभन्दा बढी १९ विधामा मनोनयन भएको छ । विक्रान्त मेसी अभिनित फिल्म ‘ट्वेल्थ फेल’ले पनि केही प्रमुख विधामा मनोनयन प्राप्त गरेको छ ।

सर्वश्रेष्ठ फिल्मको विधामा ‘ट्वेल्थ फेल’, ‘एनिमल’, ‘जवान’, ‘ओएमजी २’, ‘पठान’ र ‘रकी और रानीकी प्रेम कहानी’ मनोनीत छन् ।

सर्वश्रेष्ठ निर्देशकमा ‘ओएमजी २’ बाट अमित राय, एटली (जवान), करण जोहर (रकी और रानीकी प्रेम कहानी), सन्दीप रेड्डी वांगा (एनिमल), सिद्धार्थ आनन्द (पठान) र विधुविनोद चोपडा (ट्वेल्थ फेल) छन् ।

सर्वश्रेष्ठ क्रिटिक फिल्ममा ‘ट्वेल्थ फेल’, ‘भीड’, ‘फराज’, ‘जोरम’, ‘सामबहादुर, थ्री अफ अस’, ‘ज्वीगाटा’े छन् । सर्वश्रेष्ठ अभिनेतातर्फ रणवीर कपुर (एनिमल), रणवीर सिंह (रकी और रानीकी प्रेम कहानी), शाहरुख खान (डंकी र जवान), सनी देओल (गदर २), विक्की कौशल (सामबहादुर) छन् ।

सर्वश्रेष्ठ अभिनेत्रीतर्फ आलिया भट्ट (रकी और रानीकी प्रेम कहानी), भूमि पेड्नेकर (थ्यांक्यु फर कमिङ), दीपिका पादुकोण (पठान), कियारा आडवाणी (सत्यप्रेमकी कथा), रानी मुखर्जी (मिसेज चटर्जी अफ नर्वे) र तापसी पन्नु (डंकी) छन् ।

फिल्मफेयर अवार्ड आगामी जनवरी २८ मा गुजरातको गान्धीनगरमा आयोजना हुँदैछ । यसलाई बलिउड फिल्मको सबैभन्दा ठूलो अवार्ड मानिन्छ । २७ जनवरीमा प्राविधिक अवार्ड समारोह आयोजना गरिनेछ, जसको होस्ट आयुष्मान खुरानाले गर्नेछन् ।

२८ जनवरीमा हुने मुख्य कार्यक्रम आयुष्मानसँगै करण जोहर र मनीष पलले होस्ट गर्नेछन् । यस वर्ष रणवीर कपुर, कार्तिक आर्यन, सारा अली खान, वरुण धवन, जान्हवी कपुर र करिना कपुरले समारोहमा प्रस्तुति दिनेछन् ।