महाशिवरात्रिको अवसर पारेर शुक्रबारबाट प्रदर्शनमा आएको फिल्म ‘उपहार’ले उत्साहजनक सुरुवात गरेको छ । 

शुक्रवार उत्साहजनक व्यापार गरेको फिल्मले शनिवार धेरै हलमा ‘हाउसफुल’को व्यापार गरेको निर्माण पक्षले जानकारी दिएको छ ।

राजधानीको सिभिल मल, अष्टनारायण हल, एफक्यूब, लबिम मल, बिग मुभिज बिएसआर, ल्होत्से मलसहित मोफसलका हलमा शनिवार बिहानैदेखिका शो ‘हाउसफुल’ भएका थिए । फिल्मका निर्देशक ज्ञानेन्द्र देउजा, अभिनेत्रीद्वय पूजा शर्मा र बेनिशा हमाल, अभिनेता मुकुन भुसाल लगायतको टिम शनिवार उपत्यकाका हलमा दर्शकसँग भेटघाटमा व्यस्त रहे । 

हलमा अभिनेत्री पूजा शर्माको लोभलाग्दो क्रेज देखियो । बालाजुस्थित अष्टनारायण हल पुग्दा पूजा दर्शकको ठूलो भीडमा घेरिन् पुगिन् ।

उनीसँग तस्वीर खिचाउन दर्शकहरू ठेलमठेल गरेको देखियो । फिल्मलाई दर्शकले निकै माया दिएको भन्दै पूजाले खुशी व्यक्त गरिन् । फिल्मले दर्शकबाट प्रतिक्रिया पनि एकदमै सकारात्मक पाएको छ । 

आइतवार पनि धेरै हलमा दर्शकको उपस्थिति उत्साहजनक देखिएको छ । सोमवार सार्वजनिक बिदा भएका कारण त्यसको फाइदा पनि फिल्मलाई हुने देखिएको छ । फिल्मले दर्शकको साथ पाएसँगै केही हलले शो समेत बढाएका छन् ।

निर्माण पक्षले फिल्मको आधिकारिक कमाइ भने सार्वजनिक गरेको छैन । 

रेखा फिल्मस् र कपनगढी सिनेमा प्रालिको व्यानरमा रेखा थापा प्रस्तुतकर्ता रहेको फिल्मलाई ज्ञानेन्द्र देउजाले निर्देशन गरेका हुन् । 

फिल्ममा रेखा थापा, पूजा शर्मा, मुकुन भुषाल, बेनिशा हमाल, तेज गिरी, समर्पणजंग कार्की, सुष्मा कार्की, शिशिर राणा लगायतको अभिनय छ । बलराम शाही ठकुरी कार्यकारी निर्माता रहेको फिल्मका निर्माता सुलभ प्रतीक र समीक्षा देउजा हुन् ।

फिल्ममा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र डि गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको द्वन्द्व निर्देशन छ । 

फिल्मको वितरण उपत्यकाभित्र रिच इन्टरटेनमेन्ट र उपत्यका बाहिर एफडी कम्पनीले गरेको हो ।