×

८० बढी गीतका सर्जक

संगीतकर्ममा श्रीधरको उडान : छोटो समयमै लामो यात्रा

बुटवल | असार ८, २०८१

श्रीधर अधिकारी उमेरले जम्मा २७ वर्षमा लागे । सानैदेखि गीत/संगीतमा सक्रिय श्रीधरले अहिलेसम्म ७ दर्जन बढी गीतमा स्वर, शब्द र संगीत भरिसकेका छन् । 

उनी नेपाली लोकदोहोरी क्षेत्रको ‘उर्वर भूमि’ मानिने स्याङ्जाका हुन् । वि.सं २०५४ मा जन्मिएका उनी सानैदेखि नेपाली गीत/संगीतमा सक्रिय भएका थिए । रहरै–रहरमा सांगीतिक दुनियाँमा हाम फालेको बताउने उनी पछिल्लो समयमा स्थापित संगीतकर्मी बनिसकेका छन् । 


Advertisment

सांगीतिक क्षेत्रमा आफू एउटा विधामा मात्र केन्द्रित नभएको श्रीधर बताउँछन् । हुन पनि उनले लोकदोहोरी, आधुनिक, लोकआधुनिक र फिल्मी गीतगरी चारवटै विधाका गीतमा स्वर, संगीत र शब्द भर्न सफल भएका छन् । उनका केही गीत अहिले चर्चामा छन् । सामाजिक सञ्जालबाट चर्चामा आएकी कलाकार कल्पना विष्ट र श्रीधरको स्वरमा सार्वजनिक भएको गीत ‘मनै मरी गर्‍यो’, कल्पना विष्ट र रचना रिमालको ‘दिदी–बैनी’ अहिले युट्युबको ‘टेर्निङ’मा छन् । अर्की सामाजिक सञ्जालबाटै चर्चामा आएकी गायिका सिम्रन परियार र श्रीधरले गाएको ‘मुटुमै घाउ छ’ भन्ने गीतले पनि उनलाई चर्चा दिलाएको छ ।  


Advertisment

श्रीधर स्याङ्जाको गल्याङ नगरपालिका–११ मा जन्मिए–हुर्किए । विद्यालय तहको पढाइ गाउँबाटै सकेर उच्च शिक्षा अध्ययनका लागि २०७२ मा उनी बुटवल झरे । लुम्बिनी वाणिज्य क्याम्पस, बुटवलमा व्यवस्थापन विषय लिएर पढ्दै उनले लुम्बिनी कला केन्द्रमा संगीत सिक्न थाले । संगीत सिक्दै उनले आफूलाई निखार्दै गए । २०७५ मा आफ्नो स्वर र संगीतमा पहिलो लोकदोहोरी गीत ‘ख्यालख्यालमै पिरती’ बोलको गीत बजारमा ल्याएका थिए । श्रीधर र पूर्णकला बीसीले स्वर रहेको उक्त गीत गण्डकी र लुम्बिनीसहित सुदूरपश्चिम क्षेत्रमा रुचाइएको थियो । 

त्यसपछि श्रीधरले तीज गीत ‘सुन मायालु’ बजारमा ल्याए । त्यसले उनलाई स्रोता–दर्शकमाझ चिनाउन झनै सहयोग पुर्यायो । यसपछि उनले क्रमशः ‘मनकी रानी’ रोइला गीत ल्याए । ‘लाली जोवन’ बोलको तीज गीत आएपछि उनको चर्चा बढ्दै गयो । एलिना चौहान र विष्णु सापकोटाको स्वरमा रहेको ‘बाजा ताल’मा बोलको गीत पनि श्रीधरकै सिर्जना हो । उनी र शान्तिश्री परियारको स्वरको गीत ‘बाडुल्की ला होला’ र ‘संसारकी प्यारी प्यारी आमा’सम्म आइपुग्दा उनी सफल दर्ज भइसकेका छन् ।

‘म लोकदोहोरी गीत क्षेत्रका अब्बल कलाकारहरू जन्मिएको भूमिमा जन्मिएँ । अहिले उहाँहरूसँग काम गरिरहेको छु,’ उनी थप्छन्, ‘बद्री पंगेनी, रामजी खाण, विष्णु माझीका गीत सुनेर हुर्किएँ । त्यसले गीत–संगीतमा लाग्ने हुटहुटी पैदा गर्यो । अहिले त्यो सानो उमेरमा देखेको सपना पूरा गर्ने बाटोमा पुगेजस्तो लागेको छ ।’

श्रीधरले अहिलेसम्म ८० भन्दा गीत दर्शक–स्रोतामाझ ल्याइसकेका छन् । अहिले उनी २० वटाभन्दा बढी सिर्जना बजारमा आउने तयारीमा छन् । आफूले संगीत, स्वर र शब्द चयन गरेका सिर्जनामा नेपालका ९० प्रतिशत सबै क्षेत्रका कलाकार जोडिएको उनी दाबी गर्छन् । ‘जुन सौभाग्य मैले कमै उमेरमा पाएँ,’ उनी भन्छन् । ‘कलेजी कटक्कै’, ‘हुन्न र मायालु’, ‘बागलुङ पञ्चकोट’, ‘नजरको तिर’, ‘चाहियो भन्छिन् आमाले बुहारी’लगायत अन्य धेरै उनले गरेका सिर्जना हुन् । ‘राजा–रानी, तिमी पनि उस्तै रहिछौं र मेरो तस्वीरसम्म आउँदा मेरा गीतले युट्युबमा ‘टू एम’सम्म भ्युअर्स पुर्याएका छन्,’ उनले भने, ‘टिकटक बन्द भए पनि त्यसमा मेरा गीत २ लाखभन्दा बढी पटक प्रयोग भएको थियो ।’ 

श्रीधर सानै हुँदादेखि क्यारिकेचर (अरूको नक्कल गर्ने) पनि गर्थे । २०७३ सालतिर बुटवलको औद्योगिक व्यापार मेला हेर्न थालेपछि गीत–संगीत क्षेत्रमा क्षेत्रमा उनको रुचि बढेको हो । ‘आफूभित्रको खुबी देखाउन मञ्चमा चढेको थिएँ । शुरूमा क्यारिकेचर नै गरौँ कि भन्ने लागेको थियो,’ उनी विगत सम्झिन्छन्, ‘तर, गीत गाउन मन लाग्यो ।’ राम्रो प्रतिभा भएको कलाकारलाई अब संगीत क्षेत्रमा अप्ठ्यारो नभएको उनको बुझाइ छ । तर, कलाकार बन्छु भनेर अन्धाधुन्ध आउनेका लागि सांगीतिक क्षेत्रमा भविष्य नभएको भन्दै उनी सजग गराउन पनि पछि पर्दैनन् । ‘आफ्नो बलबुता कलाकार बन्ने प्रयास गर्नुपर्छ । अरूको लहलहैमा हाम फालेर मात्र कलाकार बन्न सकिँदैन,’ उनी भन्छन्, ‘यस क्षेत्रमा सिक्ने कुरा निरन्तर चलिरहन्छ । समयसँगै नयाँ शैलीमा काम गर्नुपर्ने हुन्छ । धैर्यता सबैभन्दा कलाकारको महत्वपूर्ण पाटो हो ।’

आफ्ना सिर्जनालाई देशमा मात्र नभएर विदेशमा रहेका नेपालीले पनि रुचाउँदै गएकोमा आफूलाई हौसला थपिएको श्रीधर बताउँछन् । पहिला उनलाई परिवार, साथी तथा शुभचिन्तकले गीत–संगीत क्षेत्रमा राम्रो भविष्य नभएको भन्दै सजगसमेत गराएका थिए । यही कारण आफूले सजगतासाथ यस क्षेत्रमा पाइला चालेको उनी बताउँछन् ।  ‘सिर्जना भनेको आफूपछि पनि रहिरहने सम्पत्ति हो । जुन क्षेत्रमा काम गर्न धैर्यता चाहिन्छ । जो मसँग छ जस्तो लाग्छ । यसैकारण पनि मैले आफ्नो कर्मलाई धैर्यताका साथ अघि बढाएको हुँ । कायम राख्न सकेको छु,’ दार्शनिक पारामा उनले भने ।

श्रीधरले करिब करिब ६ वर्ष गीत–संगीत क्षेत्रमा बिताइसकेका छन् । उनी अब यस क्षेत्रलाई सुधार र संरक्षण गर्न पनि जरुरी रहेको ठान्छन् । ‘गीत–संगीत क्षेत्रमा बेला–बेला केही विकृति पनि आइरहन्छन् । यसलाई सुधार गर्नुपर्छ । यो क्षेत्र सुन्दर र स्वच्छ रहे हामी कलाकारको इज्जत बढ्ने हो । यसकारण कलाकारिता क्षेत्रमा सुधार हुन एकदमै जरुरी छ,’ उनी भन्छन् ।’ 

विकृतिबारे बोल्न डराउन नहुने श्रीधर ठान्छन् । ‘अहिले बोल्न डराएर यस्तै अवस्था रहिरहे यो क्षेत्रमा मासिन सक्ने अवस्था नआउला भन्न सकिन्न । तर, विकृति हटाएर एकअर्कामा मैत्रीपूर्ण सम्बन्ध कायम राख्न पनि जरुरी छ । यो सम्भव पनि छ । यसका लागि सबै कलाकारमा एकता र सुधारभाव हुनुपर्‍यो ।’ गीत–संगीतमा भएका विकृति हटाउन दर्शक र स्रोता पनि जाग्नुपर्ने श्रीधरको तर्क छ । साथै संगीतकर्ममा आफूले सिकेको ज्ञान र सीप अरूलाई सिकाउने रहर पनि आफूमाझ रहेको उनको भनाइ छ ।

पुस १०, २०८०

कलाकार शिशिर भण्डारीले आफ्नो हिट गीत ‘फोटो फिरिममा’ शीर्षकमा टेलिसिरियल ल्याउने भएका छन् ।  निर्माणको तयारी सुरु भइसकेको टेलिसिरियलमा उनकै कथा, पटकथा एवं संवाद लेखन रहनेछ ।  उ...

मंसिर १३, २०८०

गायिका भूमिका गिरी र गायक प्रकाश दूतराजको सहकार्य रहेको दोस्रो गीत पनि करोड क्लबमा प्रवेश गरेको छ । उनीहरुले सहकार्य गरेको ‘देउरालीमा...’ बोलको गीतलाई युट्युबमा १ करोडभन्दा बढी पटक हेरिएको हो ।...

कात्तिक २३, २०८०

मोडल एवं अभिनेत्री दीपाशा बीसी ‘जलपरी’को मृत्यु भएको छ । स्वास्थ्यमा समस्या आएपछि बुधवार राति थापाथलीस्थित नर्भिक अस्पताल भर्ना भएकी २८ वर्षीया उनको बिहीवार दिउँसो मृत्यु भएको हो । अस्पतालले उनलाई म...

मंसिर ११, २०८०

‘चिसो हावाले’ बोलको गीत युट्युबमा सार्वजनिक गरिएको छ ।  आइतवार बेलुका अकलादेवी म्युजिकको अफिसियल युट्युब च्यानलबाट सार्वजनिक गीतमा सुरज अगस्ती, लक्ष्मी खड्का र ध्रुव रेग्मीको स्वर छ ।  ...

पुस १२, २०८०

ढुंगामाटोले बनेको घरको आँगनमा घरतर्फै फर्किएर केही मानिसहरू लाइन लागेका छन् । बार्दलीमा झुन्ड्याइएको ब्यानरमा लेखिएको छ, सक्किगोनि ।  ब्यानरको छेउमा उभिएका छन्, अर्जुन घिमिरे (पाँडे) । यो चर्चित ह...

पुस २२, २०८०

हास्य कलाकार जोडी सीताराम कट्टेल ‘धुर्मुस’ र कुञ्जना घिमिरे ‘सुन्तली’ स्टेज शोमा फर्किएसँगै मेला–महोत्सवमा खोजिन थालेका छन् । अघिल्लो शनिवार कास्कीको लेखनाथ महोत्सवमा प्रस्तुति द...

भगवान् भेटिने सूत्र

भगवान् भेटिने सूत्र

असार २९, २०८१

भगवान्‌का कुरा गर्ने धेरै छन् तर भगवान् कस्ता हुन्छन् त्यो भने कसैलाई पनि थाहा छैन । भगवान् कस्ता हुन्छन् भनेर सोध्ने हो भने शायद सबै निरुत्तर नै रहने छन् । हदैभए भगवान् भगवान्जस्तै हुन्छन् भन्नेसम्म फेला पर्ला...

देश पहिले, अनि मात्र सत्ता

देश पहिले, अनि मात्र सत्ता

असार २७, २०८१

बेलायतमा भर्खरै सम्पन्न संसदीय निर्वाचनमा १४ वर्षपछि लेबर पार्टीले तल्लो सदन अर्थात्  'हाउस अफ कमन्स्'मा प्रचण्ड बहुमत हासिल गर्‍यो । ६५० सदस्यीय तल्लो सदनमा लेबर पार्टीले करिब ६३ प्रतिशत अर्थात् ४१२ ...

प्रतिपक्षमा हुत्तिने भएपछि माओवादीमा देखिएको छटपटी र आत्मरति

प्रतिपक्षमा हुत्तिने भएपछि माओवादीमा देखिएको छटपटी र आत्मरति

असार २६, २०८१

प्रमुख सत्ता साझेदार नेकपा (एमाले)ले साथ छोडेपछि प्रधानमन्त्री पुष्पकमल दाहाल ‘प्रचण्ड’ले दुई दिनपछि (असार २८) प्रतिनिधि सभामा विश्वासको मतको सामना गर्दैछन् । ‘विश्वासको मत नपाउने जान्दाजा...

x