२२ असार २०८३, सोमबार
फिफा विश्वकप–२०२६ को दोस्रो खेल शुक्रबार बिहान एसियाली ‘पावर हाउस’ दक्षिण कोरिया र चेक गणतन्त्रबीच खेलिँदैछ ।
समूह ‘ए’अन्तर्गतको यो महत्त्वपूर्ण खेल मेक्सिकोको जापोपानस्थित ‘एस्टाडियो ग्वाडलजारामा नेपाली समयअनुसार बिहान ०७:४५ बजे शुरू हुनेछ ।
पछिल्लो फिफा वरीयताको २५ औं स्थानमा रहेको दक्षिण कोरिया एसियाको सबैभन्दा सफल विश्वकप टोली हो ।
सन् २०२२ को विश्वकपमा अन्तिम–१६ सम्मको यात्रा तय गरेको कोरियाली टोली यसपटक पनि उच्च लयमा छ । टोलीमा सन ह्युङ–मिन, ली काङ–इन र किम मिन–जाएजस्ता स्टार खेलाडी छन् ।
हाल लस एन्जलस एफसीमा आबद्ध रहेका ३३ वर्षीय कप्तान सन ह्युङ–मिन आफ्नो चौथो विश्वकप खेल्ने तयारीमा छन् ।
सम्भवत: यो उनको अन्तिम विश्वकप हुनसक्छ । त्यसैले कोरियाली समर्थकहरूले उनीबाट उत्कृष्ट प्रदर्शनको आशा गरेका छन् ।
यसैगरी, सन् २०२२ मा पोर्चुगलविरुद्ध निर्णायक गोल गरेका ह्वाङ ही–चान पनि टोलीका लागि अर्को मुख्य हतियार हुन् ।
प्रशिक्षक होङ म्युङ–बोको प्रशिक्षणमा रहेको दक्षिण कोरिया समूह ‘ए’मा छ । यो समूहमा चेक गणतन्त्रका अतिरिक्त दक्षिण अफ्रिका र आयोजक मेक्सिको पनि छन् ।
पढ्नुहोस् यो पनि- उद्घाटन खेलमा मेक्सिको र दक्षिण अफ्रिका भिड्दै, १६ वर्षपछि दोहोरिँदै इतिहास
यसैगरी, दुईपटकको उपविजेता (चेकोस्लोभाकियाको नाममा सन् १९३४ र सन् १९६२ मा) चेक गणतन्त्र २० वर्ष लामो पर्खाइपछि विश्वकपमा फर्किएको हो ।
पछिल्लो समय केही कठिन मोडबाट गुज्रिएको चेक गणतन्त्र सन् २०२५ को डिसेम्बरमा मिरोस्लाभ कोबेकलाई प्रशिक्षक नियुक्त गरेपछि लयमा फर्किएको हो ।
चेक गणतन्त्र पछिल्लो फिफा वरीयताको ४० औं स्थानमा छ । यो टोली कठिन युरोपेली क्षेत्रको छनोट चरण पार गर्दै विश्वकपको अन्तिम चरणमा पुगेको हो ।
टोलीमा बायर लेभरकुसेनका स्ट्राइकर तथा युरो–२०२० का संयुक्त शीर्ष गोलकर्ता प्याट्रिक शिक, एडम ह्लोजेक र थोमस सौसेकजस्ता अनुभवी खेलाडी छन् ।
चेक गणतन्त्रले आफ्ना करिब दुई मिटर अग्ला स्ट्राइकर थोमस चोरीको माध्यमबाट कोरियाली डिफेन्समा शारीरिक दबाब सिर्जना गर्ने रणनीति बनाएको छ ।
यी दुई टोलीबीच विश्वकपमा पहिलो पटक भिडन्त हुन लागेको हो । अन्तर्राष्ट्रिय मैत्रीपूर्ण खेलमा भने यी दुई टोली यसअघि तीनपटक आमने–सामने भएका छन् ।
त्यसमध्ये दुवै टोलीले एक–एक खेल जितेका छन् । एक खेल भने बराबरीमा सकिएको छ । सन् २०१६ मा प्रागमा भएको अन्तिम मैत्रीपूर्ण खेलमा दक्षिण कोरिया २–१ गोलले विजयी भएको थियो ।
हालको ‘फर्म’ हेर्ने हो भने, चेक गणतन्त्र पछिल्ला पाँचवटै खेलमा विजयी हुँदै उच्च मनोबलका साथ मैदान ओर्लने छ ।
दक्षिण कोरियाको पछिल्लो नतिजा भने मिश्रित छ । दक्षिण कोरियाका लागि युवा विंगर बाए जुन–होको चोट चिन्ताको विषय बनेको छ । यद्यपि, चोटबाट मुक्त भएका ली ताए–सेक टोलीमा फर्किएका छन् ।
