०३ असार २०८३, बुधबार
इन्स्टिच्युट अफ इलेक्ट्रिकल एन्ड इलेक्ट्रोनिक्स इन्जिनियर्स (आईईईई) ले शनिवार (अक्टोबर २६) का दिन आईईईई एक्स्ट्रिम १८.० कोडिङ प्रतियोगिता आयोजना गरेको छ ।
यसमा ७५ भन्दा बढी देशका २०,००० भन्दा बढी विद्यार्थीहरूले विभिन्न चुनौतीपूर्ण प्रोग्रामिङ समस्या समाधान गर्दै प्रतिस्पर्धा गर्नेछन् ।
नेपालबाट पनि ३५ वटा टोलीमा विभाजित भई ७९ विद्यार्थीले यस प्रतियोगितामा सहभागिता जनाउने तय भएको छ ।
नेपालमा आईईईई नेपाल सेक्सन, आईईईई पुल्चोक विद्यार्थी शाखा र आईईईई का व्यावसायिक सदस्यहरूको विशेष सहभागितामा स्थानीय टोलीहरूको व्यवस्थापन गरिएको छ। सहभागीहरूका लागि स्थान व्यवस्थापन, अन-साइट समर्थन, पर्यवेक्षकहरूको व्यवस्थापन र २४-घण्टे सेवा उपलब्ध गराइनेछ। यो प्रतियोगिता नेपाली समयअनुसार शनिबार बिहान ५:४५ बजे शुरू भई आइतबार बिहानसम्म सञ्चालन हुनेछ।
आईईईई एक्स्ट्रिम १८.० ले विद्यार्थीहरूलाई वास्तविक समस्या समाधान गर्दै प्राविधिक सीपहरूको विकास, अन्तर्राष्ट्रिय स्तरमा जोड्दै सहयोग र नवप्रवर्तनको अवसर प्रदान गर्नेछ। साथै, विद्यार्थीहरूको कोडिङ सीपलाई मान्यता दिने आईईईई प्रमाणपत्र र प्रतिस्पर्धामा उच्च प्रदर्शन गर्ने विद्यार्थीलाई गूगल, माइक्रोसफ्ट, मेटा (फेसबूक) जस्ता प्रविधि कम्पनीहरूमा करियरका अवसरहरू निम्त्याउन सहयोग पुर्याउने आयोजकले जनाएको छ ।
यो प्रतियोगितामा कम्प्युटर साइन्स, इलेक्ट्रोनिक्स, आईटीजस्ता विषयमा स्नातक र स्नातकोत्तर गरिरहेका विद्यार्थीहरूको विशेष सहभागिता रहनेछ । साथै, आईईईईका वरिष्ठ र अनुभवी सदस्यहरूले प्रतियोगितालाई निरीक्षण गर्दै निष्पक्ष प्रतिस्पर्धा सुनिश्चित गर्नेछन्।
नेपालमा आईईईई नेपाल सेक्सनले सहभागी विद्यार्थीहरूलाई खानपिन, बसोबास र २४-घण्टा सेवा उपलब्ध गराउनेछ। प्रतियोगितामा उच्च स्थान हासिल गर्ने नेपाली टोलीका प्रत्येक सदस्यलाई $२५० बराबरको छात्रवृत्ति दिइनेछ।
आईईईई ले शीर्ष तीन स्थानमा पुग्ने टोलीलाई आईईईई विश्वव्यापी सम्मेलनहरूमा सबै-खर्च-भुक्तान गरिने यात्रा, नगद पुरस्कार र विशेष पोशाकको व्यवस्था गर्नेछ। साथै, शीर्ष १०० टोलीले प्राविधिक सामग्रीहरू उपहार पाउनेछन्।
नेपालका लागि यो प्रतियोगितालाई एक महत्वपूर्ण अवसरको रूपमा हेरिएको छ, जसले विद्यार्थीहरूको प्राविधिक कौशल र विश्वव्यापी सञ्जाल विस्तार गर्न सहयोग पुर्याउने आयोजकको विश्वास छ ।
