१० असार २०८३, बुधबार
बागलुङको ढोरपाटन नगरपालिकाका प्रमुख तथा इमेज सहकारीका अध्यक्ष देवकुमार नेपालीमाथि सूर्यदर्शन सहकारी ठगी प्रकरणमा पनि अनुसन्धान अघि बढेको छ ।
सोही सहकारीको रकम गोर्खा मिडियामा लगेर अपचलन गरेको प्रकणमा राष्ट्रिय स्वतन्त्र पार्टीका सभापति रवि लामिछानेमाथि पनि अनुसन्धान जारी छ । लामिछाने कात्तिक २ गतेदेखि कास्की प्रहरीको हिरासतमा छन् । कास्की जिल्ला अदालतले आइतबार मात्र लामिछानेमाथि अनुसन्धान गर्न प्रहरीलाई १३ दिनको म्याद थप दिएको छ ।
आइतबार नै बागलुङबाट पोखरा ल्याइएका देवकुमार नेपालीलाई कास्की प्रहरीले रवि जोडिएको सूर्यदर्शन सहकारी ठगी प्रकरणमा समेत अनुसन्धान थालेको हो ।
प्रहरी स्रोतका अनुसार नेपालीको सूर्यदर्शनसँग शुरूआती सम्बन्ध रहेकाले अनुसन्धान थालिएको हो । कास्की प्रहरी प्रमुख, एसपी श्यामबाबु ओलीयाले नेपालीलाई सूर्यदर्शन सहकारी ठगीका विषयमा छानबिन भइरहेको पुष्टी गरे ।
इमेज सहकारी ठगी प्रकणमा भारतको नयाँ दिल्लीबाट पक्राउ परेका नेपालीलाई असोज १३ गते बागलुङ जिल्ला अदालतले थुनामा राख्न अनुमति दिएको थियो । अदालतले १५ असोजमा उनलाई पुर्पक्षका लागि कागाकार पठाउन आदेश दियो । बागलुङमा मात्र उनले १ अर्ब ४८ करोड बढी रूपैयाँ अपचलन गरेको उजुरी दर्ता भएको थियो ।
यता, पोखरा सृजनाचोकमा रहेको इमेज सहकारीमा ६० करोड रूपैयाँ अपचलन भएको उजुरी कास्की प्रहरीमा छ । १८ महिनादेखि फरार रहेका नेपालीले समय-समयमा सामाजिक सञ्जालमार्फत बचतकर्ताको रकम फिर्ता दिने प्रतिबद्धता जनाइहन्थे । तर, उनी प्रहरीको सम्पर्कमा थिएनन् । लामो समयपछि प्रहरीले उनलाई भारतको नयाँ दिल्लीबाट पक्राउ गरेर नेपाल ल्याएको थियो । प्रहरीसँगको बयान पनि नेपालीले बचतर्कताको रकम फिर्ता गर्ने दोहोर्याएका छन् ।
सूर्यदर्शनसँग देवकुमारको साइनो के हो ?
इमेज सहकारीका संस्थापक अध्यक्ष रहेका देवकुमार नेपाली सूर्यदर्शनका उपाध्यक्ष थिए । सहकारीमा अध्यक्ष बन्न चाहेका नेपालीलाई समर्थन नभएपछि सूर्यदर्शनबाट २०६८ सालमा बाहिरिएका थिए । पछि उक्त सहकारीको नेतृत्व गितेन्द्रबाबु राई (जीबी)ले गरे ।
आफ्नो पक्षमा आउने सूर्यदर्शनका कर्मचारीसहित सहकारीबाट बाहिरिका नेपालीले इमेज सहकारी स्थापना गरेका थिए । नेपाली सूर्यदर्शनबाट बाहिरिएपनि सहकारीका तत्कालीन उपाध्यक्ष रहेकाले छानबिनमा तानिएका प्रहरी बताउँछ ।
‘कुनै समय उनी सूर्यदर्शन सहकारीका उपाध्यक्ष रहेछन् । त्यही भएर अनुसन्धानका लागि तानिएको हो । इमेज सहकारीको विषय पनि छ’, प्रहरी स्रोतले भन्यो ।
पोखरामा इमेज खोलेको एक वर्षपछि उनले बागलुङमा सहकारीको प्रमुख कार्यालय राखेर शाखा बढाएका थिए । पोखरा र बागलुङमा गरेर उनले झण्डै २ अर्ब बराबरको रकम हिनामिना गरेको बताइएको छ ।
देवकुमार भन्छन्- अपचलन होइन, लगानी गरेको हुँ
२०८० जेठ ५ गतेबाट फरार रहेका नेपाली त्यसको केही महिनापछि सामाजिक सञ्जालमा उपस्थित भएका थिए । बचतकर्ताको रकम फिर्ता गर्ने प्रतिबद्धता जाहेर गर्दै उनले फेसबुकमा पोष्ट गरेका थिए । उनले सम्पत्ति बेचेर भएपनि बचतकर्ताको रकम फिर्ता गर्ने बताउँदै आएका छन् । प्रहरीसँगको बयानमा पनि उनले सोही कुरा दोहोर्याएका छन् । ठगी मुद्दामा थुनामा रहेका नेपालीको भनाइ छ –अपचलन होइन लगानी गरेको हुँ ।
‘चाहनुहुन्छ भने अहिल्यै नै मेरो सम्पत्ति बचतकर्ताको नाममा, सहकारीको नाममा नामसारी गरिदिन्छु । होइन भने बिक्री गरेर दिन्छु’, उनको बयान उद्धत गर्दै प्रहरी स्रोतले भन्यो ।
नेपालीले पोखरा लगायत विभिन्न स्थानमा आफ्नो, श्रीमती, भान्जा र साथीहरूको नाममा जग्गा र घर जोडेको पाइएको छ । इमेज ठगी प्रकरणमा पक्राउ परेका ओमबहादुर दर्जी भने डेढ लाख रूपैयाँ धरौटी बुझाएर रिहा भएका छन् । स्रोतका अनुसार सम्पत्ति बिक्री वितरणमा सहजीकरण गर्नका लागि उनलाई छोडिएको हो । बचतकर्ता र नेपालीसँग पनि रकम फिर्ता हुनेगरि मिलापत्रको प्रक्रिया अगाडि बढिरहेको स्रोतको भनाइ छ ।
