नेपाल टेलिकमका प्रिपेड तथा पोष्टपेड मोबाइलमा रिचार्ज गर्दा भ्वाइस तथा डेटा बोनस पाइने भएको छ । मंगलबारदेखि शुरू भएको यो सुविधा आउँदो पुस १७ गतेसम्म जारी रहने छ । 

टेलिकमले रिचार्ज कार्डको अलवा विभिन्न विद्युतीय माध्यमबाट टपअप गर्न सकिने व्यवस्था गरेको कम्पनीले जनाएको छ । टेलिकमका प्रवक्ता हरि ढकालका अनुसार ५० देखि ९९ रूपैयाँ रिचार्ज गर्दा ३ दिनका लागि आफ्नो नेटवर्कभित्र २० मिनेटको भ्वाइस कल बोनस पाइनेछ । 

यस्तै, १०० देखि १९९ रूपैयाँ रिचार्ज गर्दा ३ दिनका लागि ५० मिनेट, २०० देखि ४९९ रूपैयाँ रिचार्ज गर्दा एक दिनमा १ जीबी खर्च गर्नेगरी २ दिनका लागि २ जीबी डेटा र ५०० रूपैयाँभन्दा माथि रिचार्ज गर्दा एक दिनमा २ जीबी खर्च गर्न पाउनेगरी ४ दिनका लागि ८ जीबी डेटा उपलब्ध हुने प्रवक्ता ढकालले बताए । 

यसका साथै सहज तवरले अविछिन्न रूपमा सञ्चार सेवा उपभोग गर्न ब्यालेन्स सकिएको अवस्थामा समेत प्रिपेड मोबाइल प्रयोगकर्ताहरूका लागि नमस्ते सापटीको सुविधा कम्पनीले उपलब्ध गराएको छ ।

प्रिपेड मोबाइल प्रयोगकर्ताहरूले स्टार्ट (Start) टाइप गरी १४७७ मा मेसेज पठाएर अथवा *१४७७# डायल गरी १ छनौट गरेर सापटी लिन सक्ने टेलिकमका प्रवक्ता ढकालले बताए ।