गौशालास्थित एक होटलमा मृत फेलापरेकी कागेश्वरी मनोहराकी २२ वर्षीया सुस्मिता खड्काको मृत्युको कारण अझै खुल्न सकेको छैन ।

गौशाला वृत्तले सुस्मिताको शव पोस्टमार्टमको लागि त्रिभुवन विश्वविद्यालय शिक्षण अस्पताल महाराजगञ्जमा पठाएको ११ दिन बितिसकेको छ । 

गत पुस १७ गते होटलको कोठामा मृत फेलापरेकी सुस्मिताको हत्या भएको आशंका गरिएको थियो । सुस्मितासँगै उक्त होटलमा गएका ओखलढुंगा सुनकोशी गाउँपालिका– ३ सिस्नेरीका २३ वर्षीय देवबहादुर थापा पनि पुस २० मा गृहजिल्लामै झुन्डिएको अवस्थामा मृत फेला परे । 

उनीहरूबीच प्रेम सम्बन्ध रहेकोबारे परिवार जानकार थियो । थापा जापान गएर फर्किएका थिए । सुस्मिता पनि जापानिज भाषा पढिरहेकी थिइन् । 

काठमाडौं उपत्यका अपराध अनुसन्धान कार्यालय र प्रहरी वृत्त गौशालाले घटनाको अनुसन्धान गर्दा तत्काल मृत्युको कारण खुल्न सकेको थिएन । घटनास्थल वरपर कुनै शंकास्पद वस्तु वा अन्य कुनै तथ्य फेलापरेको थिएन । मात्रै राति सँगै बसेका थापा फरार भएको खुल्यो । प्रहरीले खौज्दै गर्दा उनी पनि झुन्डिएको अवस्थामा मृत फेला परे । 

सुस्मिताका आफन्तले प्रहरीमा थापाविरुद्ध कर्तव्य ज्यान मुद्दामा उजुरी दिएका थिए । गौशाला वृत्तका डीएसपी सुकदेव खनालले शवको पोस्टमार्टम रिपार्ट नआइकन मृत्युको कारण नखुल्ने बताए ।

उनले लोकान्तरसँग भने, ‘कुनै/कुनै घटनामा पोस्टमार्टम रिपोर्ट आउन समय लाग्छ, हामीले भिसेराका लागि पनि पठाएका छौं । रिपोर्ट आएपछि मृत्युको कारण खुल्छ ।’

प्रहरीका अनुसार पीडित र पीडक दुवैको मृत्यु भएको अवस्थामा मृत्युको कारण खुल्न समय लाग्छ । 

‘अब यो घटनामा सुस्मिताको मृत्युको कारण पत्ता लगाउनेबाहेक अरू कानूनी प्रक्रिया अगाडि बढ्ने देखिँदैन,’ गौशाला वृत्तका एक अनुसन्धान अधिकृतले भने, ‘घटना वारदातमा संलग्न भनिएका थापाको नै मृत्यु भएपछि प्रतिवादी कसलाई बनाउने ?’