१९ असार २०८३, शुक्रबार
भारत सरकारको सहयोगमा मकवानपुरमा तीन करोड नेपाली रूपैयाँ लागतमा विद्यालय भवन निर्माण गरिएको छ ।
‘नेपाल-भारत विकास सहयोग’ अन्तर्गत भारत सरकारको आर्थिक सहयोगमा निर्मित जन कल्याण माध्यमिक विद्यालयको भवनको बुधबार उद्घाटन भएको छ ।
मकवानपुर जिल्ला समन्वय समितिका प्रमुख ललित बहादुर घलान र काठमाडौंस्थित भारतीय राजदूतावासका प्रथम सचिव वशिष्ट नन्दनले बुधबार संयुक्त रूपमा नवनिर्मित विद्यालय भवनको उद्घाटन गरे ।
उक्त कार्यक्रममा राजनीतिक प्रतिनिधि, सरकारी अधिकारी, सामाजिक कार्यकर्ता, विद्यालयका शिक्षक, विद्यार्थी र उनीहरूका अभिभावकको पनि उपस्थिति थियो ।
‘नेपाल-भारत विकास सहयोग’ अन्तर्गत भारत सरकारको अनुदान विद्यालय भवन र अन्य सम्बद्ध सुविधाको निर्माणमा प्रयोग गरिएको थियो ।
यो परियोजनालाई उच्च प्रभाव सामुदायिक विकास परियोजना (एचआईसीडीपी)को रूपमा लिइएको थियो र मकवानपुरको जिल्ला समन्वय समितिमार्फत कार्यान्वयन गरिएको थियो ।
जन कल्याण माध्यमिक विद्यालय सन् १९६८ मा प्राथमिक विद्यालयको रूपमा स्थापना भएको हो । सन् १९८५ मा यसलाई उच्च माध्यमिक विद्यालयमा थप स्तरोन्नति गरिएको थियो । यस विद्यालयमा लगभग ८५० विद्यार्थी अध्ययनरत रहेका छन् । जसमध्ये ५४ प्रतिशत छात्रा रहेको विद्यालय प्रशासनले जनाएको छ ।
कार्यक्रममा मकवानपुर जिल्ला समन्वय समितिका प्रमुख, विद्यालय व्यवस्थापनका अध्यक्ष र अन्य सरोकारवालाहरूले नेपालका जनताको लागि भारत सरकारले गरिरहेको विकास सहयोगको प्रशंसा गरे ।
उनीहरूले निर्माण गरिएको पूर्वाधारले मकवानपुरको जन कल्याण माध्यमिक विद्यालयका विद्यार्थीलाई राम्रो शिक्षा प्रदान गर्न उपयोगी हुने विश्वास व्यक्त गरे । यसले सिकाइका लागि उपयुक्त वातावरण सिर्जना गर्नुका साथै उक्त क्षेत्रमा शिक्षा क्षेत्रको समग्र विकासमा योगदान पुर्याउन पनि मद्दत गर्ने विश्वास लिइएको छ ।
नजिकको छिमेकी भएको नाताले भारत र नेपालबीच व्यापक र बहुक्षेत्रीय सहकार्य रहेको छ । उच्च प्रभाव सामुदायिक विकास परियोजनाको कार्यान्वयनले नेपालीको उत्थान र प्राथमिकताका क्षेत्रमा पूर्वाधारको विस्तारका लागि सरकारले चालेका प्रयासमा भारत सदैव हातेमालो गर्न तयार रहेको दूतावासले जनाएको छ ।
