२३ जेठ २०८३, शनिबार
राजसंस्था फर्काउने भन्दै राजतन्त्रका समर्थक विभिन्न समूहले यही चैत १५ गते काठमाडौंको तीनकुने क्षेत्रमा आयोजना गरेको हिंसात्मक प्रदर्शनको चौतर्फी विरोध भएको छ । पञ्चायतकालका मन्त्री नवराज सुवेदी नेतृत्वको ‘राजसंस्था पुनर्स्थापनाका लागि संयुक्त जनआन्दोलन समिति’ले शुक्रबारको प्रदर्शन आयोजना गरेको थियो ।
२ जनाको ज्यान जानेगरी भएको हिंसात्मक प्रदर्शनको कथित जनकमान्डर दुर्गा प्रसाईंलाई तोकिएको थियो, जो अहिले फरार छन् । अज्ञात स्थलबाट सामाजिक सञ्जालमा पोस्ट गर्दै उनले त्यो हिंसात्मक घटनाको बचाउ गरिरहेका छन् ।
राजावादीले त्यस्ता उच्छृङ्खल व्यक्तिलाई जनकमान्डर बनाएका थिए, प्रसाईं स्वयंले सुरक्षा घेरामा बसेका प्रहरीमाथि गाडी चलाउन खोजेका थिए । हिंसा भड्काउने कामको शुरूआत प्रसाईंले नै गरेका थिए, जुन नियोजित जस्तो देखिन्छ ।
प्रहरी घेरा तोड्दै प्रसाईं संसद् भवनतर्फ बढ्न खोज्दै थिए, संसद् भवनको गेटमा लगेर गाडी ठोक्काउने उनको योजना रहेको सुरक्षा संयन्त्रको आशंका छ ।
चैत १५ गते भएको त्यो हिंसात्मक प्रदर्शनलगत्तै बसेको मन्त्रिपरिषद् बैठकले घटनाको सम्बन्धमा सत्य तथ्य छानबिन गरी दोषीउपर कारबाही गर्न गृह मन्त्रालयलाई जिम्मा लगाएको थियो । हिंसा भड्काउन उद्दत भएको भन्दै राप्रपा महामन्त्री एवं बहालवाला सांसद डा. धवलशमशेर राणासहित ५ दर्जन बढी पक्राउ परेका छन् ।
राजसंस्था पुनर्स्थापनाका लागि आयोजना गरिएको भनिएको प्रदर्शन सुरक्षाकर्मीमाथि आक्रमण, व्यक्तिका घर र राजनीतिक दलका पार्टी कार्यालयमा आगजनी र लुटपाटमा परिणत भएको थियो । राजनीतिक प्रकृतिको भन्दा पनि समाजमा हिंसा भड्काउने उद्देश्यले प्रेरित जस्तो देखिएको थियो, शुक्रबारको प्रदर्शन ।
सोमबार प्रतिनिधिसभा बैठकमा सम्बोधन गर्दै प्रधानमन्त्री केपी शर्मा ओलीले १५ गतेको आन्दोलन भड्काउनमा पूर्वराजा ज्ञानेन्द्र शाहको संलग्नता रहेको भन्दै उनले उन्मुक्ति पाउन नसक्ने बताएका छन् ।
पूर्वराजा ज्ञानेन्द्रले गत फागुन ७ गते आफू अघि बढ्ने, साथ देऊ भन्दै वक्तव्यबाजी गरेपछि ठाउँ–ठाउँमा स्वागत कार्यक्रम राख्दै जनमत भड्काउने काम शुरू भएको ओलीले संसद्मा बताए । ‘उहाँले चैत १४ गते समाज बिथोल्न लागिपरेका एक अवाञ्छित व्यक्तिलाई आफ्नै निवासमा डाकेर कथित ‘जनकमान्डर’ तोक्नुभयो र हिंसात्मक वारदातका लागि खटाउनुभयो’ ओलीले संसद्मा भनेका थिए ।
ओलीले संसद्मा भनेका छन्– ‘आपराधिक घटनामा संलग्न कसैले पनि उन्मुक्ति पाउँदैन, पाउनु हुन्न । यसमा पूर्वराजा शाहले पनि उन्मुक्ति पाउनु हुन्न । फेरि राजा बन्छु, व्यवस्था मास्छु भन्नेले यी सबै शृङ्खलाबद्ध घटनामा आफ्नो धारणा सार्वजनिक गर्नु पर्दैन ? मानिसलाई मर्नलाई दुरुत्साहन गर्ने जनकमान्डर, इतिहासले कुनामा फ्याँकेका व्यक्ति अभियानका संयोजक, धनजनको क्षति र लुटपाट, शासक बन्ने मनसुवा बोक्ने व्यक्ति सिरकभित्र चुपचाप कसरी हुन सक्छ ? यी सबै घटनाको मूल जिम्मेवार उहाँ हो, उहाँले लिनु पर्छ ।’
प्रधानमन्त्रीले संसद्मा गरेको प्रतिबद्धता अनुसार तीनकुने घटनाका दोषीउपर कारबाही हुनुपर्छ । हिंसा भड्काउनेहरू कारबाहीको भागीदार हुनैपर्छ, कसैले उन्मुक्ति पाउनु हुन्न ।
