०३ असार २०८३, बुधबार
राष्ट्रपति रामचन्द्र पौडेलले विद्यालय शिक्षा विधेयक संसद्को चालू बजेट अधिवेशनबाटै पारित हुने बताएका छन् ।
संसद्को संयुक्त बैठकमा सरकारको नीति तथा कार्यक्रम सार्वजनिक गर्दै राष्ट्रपति पौडेलले यस्तो घोषणा गरेका हुन् ।
‘विद्यालय शिक्षा सम्बन्धी कानुनलाई संशोधन तथा एकीकरण गर्न बनेको विधेयकलाई यसै अधिवेशनबाट पारित गरिनेछ,’ पौडेलले भने ।
सरकारले केही गत बुधबार शिक्षक महासंघसँग वार्ता गर्दै असार १५ गतेभित्र विद्यालय शिक्षा विधेयक पारित गर्ने समझदारी गरेको थियो । सोही समझदारीपछि शिक्षकहरूले २९ दिनदेखिको आन्दोलन टुंग्याएका थिए ।
सरकारले नीति कार्यक्रममा विद्यालय शिक्षाको शासकीय सुधारको लागि दीर्घकालीन मार्गचित्र तयार गर्ने पनि जनाएको छ । त्यस्तै, शिक्षालाई सर्वसुलभ, गुणस्तरीय र जीवनोपयोगी बनाइने कार्यक्रम पनि समेटिएको छ ।
नीति कार्यक्रममा सरकारी र निजी शैक्षिक संस्थाहरूको पाठ्यक्रममा एकरूपता ल्याउने घोषणा पनि गरिएको छ ।
