१९ असार २०८३, शुक्रबार
पछिल्ला केही दिनमा विद्युत वितरण प्रणालीमा समस्या देखिएपछि प्राधिकरणमाथि प्रश्न उठाएको छ । प्राधिकरणको नयाँ नेतृत्वलाई जोडेर प्रश्न उठाउने गरिएको छ ।
तर, प्राधिकरणले यो पुरानै समस्या रहेको र हाल समस्या समाधानका लागि पहल भइरहेको जनाएको छ ।
प्राधिकरणका कार्यकारी निर्देशक कुलमान घिसिङका पालामा विद्युतको समस्या नरहेको भन्दै उनका समर्थकहरूले वर्तमान नेतृत्वप्रति प्रश्न उठाइरहेका छन् ।
तर, प्राधिकरणका नयाँ नेतृत्व आएसँगै लोडसेडिङको समस्या देखिएको भन्दै सरकारको आलोचना भइरहेका बेला प्राधिकरणले पुरानो पत्र सार्वजनिक गरेको छ । जतिबेला प्राधिकरणको नेतृत्वमा घिसिङ थिए । बेलाबेलामा ट्रिपिङ हुने गरेको भनेर त्यतिबेला पनि प्राधिकरणको आलोचना हुने गरेको थियो ।
उक्त समस्या समाधान गर्न त्यतिबेला अध्ययन तथा राय सिफारिसका लागि समिति नै बनेको थियो ।
घिसिङले २०८० साउन २६ गते आयोजना तथा व्यवस्थापन निर्देशनालयका उपकार्यकारी निर्देशक तारा प्रसाद प्रधानको संयोजकत्वमा पाँच सदस्यीय समिति बनाइएको पाइएको छ ।
समितिमा कार्यकारी निर्देशकको सचिवालयका निर्देशक कमल आचार्य, प्रसारण निर्देशनालयका प्रबन्धक थर्कबहादुर थापा, ईलेक्ट्रो मेकानिकल वर्कशप निर्माण आयोजनाका उपप्रबन्धक सुरज दाहाल र ग्रीड सञ्चालन विभागका इन्जिनियर करम हुसेन खान रहेका थिए ।
त्यतिबेला समस्याको अध्ययन गरी ७ दिनभित्र राय सिफारिससहितको प्रतिवेदन पेस गर्न भनिएको थियो ।
उक्त पत्रमा भनिएको छ, ‘विगत केही समयदेखि विद्युत वितरण प्रणालीमा बेला बेलामा अचानक लाइन जाने (Line Trip हुने), विद्युतको भोल्टेज स्तर अस्वाभाविक रूपमा तल/माथि (Up/Down) हुने, न्यून भोल्टेजस्तरको कारण विद्युतीय उपकरणहरू समेत नचल्ने, भरतपुर (आँपटारी) लगायतका केही स्थानका सब-स्टेशन/संरचनाहरूमा पटक-पटक समस्या आइरहने गरेको लगायतका समस्याहरू देखापर्नुको साथै गुनासोहरू समेत प्राप्त हुने गरेकोले..’, समितिका पदाधिकारीलाई दिइएको पत्रमा भनिएको छ, ‘ उल्लिखित समस्याहरूको कारण पहिचान तथा समस्या समाधानका लागि अपनाउनुपर्ने उपायहरूका सम्बन्धमा अध्ययन गरि प्रतिवेदन पेस गर्न मिति २०८०/०४/२६ गतेको निर्णयानुसार देहाय बमोजिमको अध्ययन तथा राय सिफारिस कमिटी गठन गरिएको हुँदा सो सम्बन्धमा अध्ययन गरि ७ दिन भित्र राय सिफारिससहितको प्रतिवेदन पेस गर्न हुन निर्णयानुसार अनुरोध गरिन्छ ।’
