नबिल बैंकको सामाजिक उद्यमशीलता कार्यक्रम ‘नबिल स्कूल अफ सोसल इन्टरप्रेनरसीप’ अन्तर्गत बर्दघाटमा २५ युवालाई प्रमाणपत्र हस्तान्तरण गरिएको छ । 

पश्चिम नवलपरासीको बर्दघाटमा रहेको दिव्यज्योति बहुमुखी क्याम्पसमा दोस्रो चरणको ६ महिना लामो तालिममा सहभागी युवालाई प्रमाणपत्र उपलब्ध गराइएको हो । 

पश्चिम नवलपरासी-१ बाट प्रतिनिधिसभा सदस्य निर्वाचित सांसद विनोद चौधरीले उनीहरूलाई प्रमाणपत्र प्रदान गरे । पहिलो चरणमा सोही क्याम्पसबाट ५० जना युवाले तालिम लिएर उद्यमशीलता शुरू गरिसकेका छन् । 

सांसद चौधरीले युवाहरूलाई आफूले तालिमबाट सिकेको कुरा साथीहरूलाई पनि सिकाउन आग्रह गरे । ‘दिव्यज्योतिले ५० वटा उद्यमी पहिला नै जन्माइसकेको छ । अब यी नयाँ भाइबहिनीहरूले के संकल्प गरेर जानुपर्छ भने म आफू मात्रै सफल हुन्न,’ उनले भने, ‘इच वान टिच वान’ भन्ने सिद्धान्त अंगिकार गर्नुपर्छ । म मात्र हैन म अर्को पनि एउटा उद्यमी जन्माउँछु भन्ने मानसिकताका साथ आज तपाईंहरू यहाँबाट जानुभयो भने नबिलको यो कामले सार्थकता पाउँछ ।’

नेपालका प्रतिष्ठित उद्योगपति समेत रहेका चौधरीले उद्यमशील बन्न अनुशासन र आत्मविश्वास आवश्यक हुने बताए । ‘उद्यमशीलताले खोज्ने भनेको सबैभन्दा ठूलो कुरा अनुशासन हो । दोस्रो, आफूमाथि विश्वास गर्नु हो । यदि आफूमा आत्मविश्वास छ भने जस्तोसुकै कठिन समयमा पनि तपाईंले सफलता प्राप्त गर्नसक्नुहुन्छ’, उनले भने । 

पछिल्लो समय नेपालमा केही पनि गर्न सम्भव छैन भन्दै युवाहरूमा निराशा बढेको आफूले पाएको उनको भनाइ थियो । 

‘कहाँ नेपालमा गर्न सकिन्छ ? यहाँ गर्नै दिँदैन । सरकारले दु:ख दिन्छ । फलानाले दु:ख दिन्छ । यसले दु:ख दिन्छ, उसले दु:ख दिन्छ । त्यो त्यो मानसिकता बोक्ने मानिसले कहिले पनि केही गर्न सक्दैन’, चौधरीले भने, ‘यस्तो निराशाका बीचमा म गर्छु भन्ने पनि मान्छेको एउटा ठूलै जमात छ देशमा । उहाँहरूले गरिराख्नुभएको छ ।’ 

नबिल बैंकको सामाजिक उद्यमशीलता कार्यक्रमले स्थानीयस्तरमा उद्यमशीलताको विकास गर्दै युवाहरूलाई स्वरोजगार बनाउने र सामाजिक समस्या समाधानमा टेवा पुर्‍याउने लक्ष्य लिएको नबिल बैंकले जनाएको छ । 

बैंकले यो कार्यक्रम अन्तर्गत देशभर विभिन्न शैक्षिक संस्थाहरूसँगको सहकार्यमा युवाहरूलाई उद्यमशील तामिल दिँदै आएको छ । समाजमा सकारात्मक परिवर्तन ल्याउन सक्ने नवीन उद्यमशील सोच भएका व्यक्तिहरूलाई प्रोत्साहन गर्नु र उनीहरूको व्यावसायिक सपनालाई साकार पार्न सहयोग गर्नु कार्यक्रमको उद्देश्य रहेको छ ।