२९ जेठ २०८३, शुक्रबार
ओखलढुङ्गाका कवि रेणुका श्रेष्ठद्वारा रचित ‘भावनाका लहरहरू’ बालकविता सङ्ग्रहको लोकार्पण गरिएको छ । नेपाल प्रज्ञा-प्रतिष्ठानका प्राज्ञ सभा सदस्य चेतनाथ धमलाले उक्त कविता कृतिको लोकार्पण गरे ।
प्राज्ञ धमलाले ‘भावनाका लहरहरू’ कृतिले बालमनोविज्ञानलाई आत्मसात् गर्दै उत्साह प्रदान गरेको उल्लेख गरे । कृति समाजका साहित्यिक, सांस्कृतिक र सामाजिक लगायतका पक्षमा बालबालिकाको भावनाअनुरूप चित्रित भएको धमलाले बताए ।
उनले ‘भावनाका लहरहरू’ बालकविता सङ्ग्रह बालबालिकाका लागि उपयोगी, सरल र सटीक रहेको बताए । कवयित्री रेणुका श्रेष्ठको पहिलो कृति नै विधागत रूपमा स्तरीय रहेको उनले बताए ।
कार्यक्रममा अतिथि स्रष्टाहरू गणेशकुमार श्रेष्ठ , दिव्यदेव गिरी र गोपाल भित्रीकोटीले शुभकामना मन्तव्य राखे ।
कवि श्रेष्ठले आफूले बालबालिकाको मनोभावना अनुसार कविता रच्ने प्रयत्न गरेको बताइन् । श्रेष्ठले आफ्ना पिता साहित्यकार बाबुराम श्रेष्ठ र उपन्यासकार बहिनी पार्वती श्रेष्ठको प्रभाव र प्रेरणाले कविता लेखनको थालनी गरेको बताइन् ।
शिक्षण पेसामा आबद्ध श्रेष्ठको यो कृति पहिलो हो ।
