गायिक एलिना चौहान यतिबेला चर्चामा छिन् । सामाजिक सञ्जालमा आफूप्रति नकारात्मक र भ्रामक सामग्री पोस्ट तथा कमेन्ट गर्नेहरूको प्रोफाइल सार्वजनिक गर्दै कारबाहीको माग गर्दै आएकी चौहानको प्रयासलाई धेरैले प्रशंसा गरेका छन् ।

सोमबार चौहान आफैं नेपाल प्रहरीको साइबर ब्यूरोमा पुगेर चार जनाविरुद्ध विद्युतीय कसुरमा कारबाही गर्न माग गर्दै उजुरी लिएर पुगेकी छिन् ।

प्रधानमन्त्री केपी शर्मा ओलीले समेत ‘साहसी छोरीहरू’ भनेर बधाई दिएका थिए ।

प्रहरीमा दिएको उजुरीको प्रसंगलाई लिएर लोकान्तरकर्मी सुवास गोतामेले चौहानसँग गरेको कुराकानीको सम्पादित अंश

तपाईंले आज साइबर ब्यूरोमा उजुरी दिनु भएको हो ?

हो । मैले चार जनाविरुद्ध विद्युतीय कसुरमा कारबाहीको माग गर्दै उजुरी दिएको हुँ ।

धेरै दिनसम्म चुपचाप बस्नु भयो, अहिले किन उजुरी दिनुभएको हो ?

मैले पहिला पनि मेराविरुद्ध गरिएका कमेन्टको जवाफ दिँदै आएको थिएँ । पटक–पटक जवाफ दिँदा पनि कमेन्टहरू रोकिएनन्, त्यसपछि कानूनी रूपमै जान्छु भनेर उजुरी दिएको हुँ ।

न्याय पाउँछु भन्नेमा विश्वस्त हुनुहुन्छ ?

मेरो लडाइँ मसँग मात्रै सम्बन्धित छैन, धेरै छोरीहरू मजस्तै पीडामा छन् । कतिले देखाउन सक्दैनन्, प्रस्तुत हुन सक्दैनन् । अब त अति भयो भनेर मैले प्रधानमन्त्री कार्यालयसम्म पुगेर पनि न्यायको लागि लड्छु भनेर विश्वस्त भई उजुरी दिएको हुँ ।

तपाईंलाई त प्रधानमन्त्रीले पनि बधाई दिनुभयो नि ?

हो । मैले साइबर ब्यूरोमा पनि प्रहरीहरूलाई भनेको थिएँ, कारबाही गर्न तपाईंहरूलाई कतैबाट रोकतोक भयो भने म प्रधानमन्त्रीज्यूसम्म पुगेर पनि बाटो खुलाउँछु । चरित्रहत्याका क्रियाकलाप रोक्ने काम सरकारको हो । नारीमाथिको अत्याचार अब सहन सकिँदैन ।

तपाईं न्यायका लागि लड्दा अरूका लागि पनि नजिर स्थापित होस् भन्ने चाहनुहुन्छ हो ?

हो । आज सामाजिक सञ्जाल हेर्नुभयो भने जो जसले पनि अरूको चरित्रहत्या गरिदिएका छन् । कानून छ, तर कारबाही छैन । यो मेरो मात्रै लडाईं होइन, अरू महिलाहरूको लागि पनि हो । यसले एउटा नजिर स्थापित होस् र कानून कार्यान्वयन पनि होस् भनेरै उजुरी दिएका हुँ ।

अन्त्यमा के भन्नुहुन्छ ?

देशमा कानून छ । मेराविरुद्ध चरित्र हत्या गर्नेहरूका मसँग प्रशस्तै प्रमाण छन् । अनि न्याय नपाउने भन्ने पनि हुन्छ र ? मैले न्याय पाउनुपर्छ । मैले न्याय पाएँ भने अरू नारीहरूले पनि न्याय पाउँछन् । यसले एउटा नजिर बस्छ । प्रमाण हुँदाहुँदै पनि न्याय पाइनँ भने प्रधानमन्त्रीज्यूलाई समेत गुहार्छु ।