प्राइम एसोसिएट्स, विटगन ग्रुपका निर्माणसम्बन्धी अत्याधुनिक उपकरण तथा औजारहरूको नेपालका लागि आधिकारिक बिक्रेता नियुक्त भएको छ ।

​​​​विगत लामो समयदेखि अटोमोबाइल, रोड, बिल्डिङ र ब्रिज कन्स्ट्रक्सन इक्विपमेन्टको निरन्तर बिक्री–वितरण गर्दै आएको​ प्राइम एसोसिएट्सलाई विश्वका अत्याधुनिक प्रविधि प्रयोग गरी उत्पादन हुने जोन डियरे ग्रुप अन्तर्गतको ​विटगन ग्रुपले आधिकारिक बिक्रेता नियुक्त गरेको हो ।

काठमाडौंमा आयोजित एक कार्यक्रमका बीच विटगन ग्रुपका एमडी, सीईओ रमेश पलागिरी र प्राइम एसोसिएट्स प्रालिका कार्यकारी निर्देशक दीपक आचार्यले यससम्बन्धी सम्झौतापत्र आदानप्रदान गरेका हुन् । सो अवसरमा नयाँ ग्राहकलाई ती उपकरणको चाबी समेत हस्तान्तरण गरिएको थियो ।

सो अवसरमा सीईओ पलागिरीले विश्वमै उत्कृष्ट निर्माण उपकरण मानिने विटगन ग्रुप अन्तर्गतका इक्विपमेन्ट नेपाली बजारमा धेरै ग्राहकले रुचाइरहेको र आगामी दिनमा यसको प्रयोग अझै बढ्ने बताए ।

प्राइम एसोसिएट्स प्रालिका कार्यकारी निर्देशक आचार्यले लामो समयदेखि यही क्षेत्रमा क्रियाशील भएको र हाल नयाँ ब्रान्डमार्फत नेपाली ग्राहकलाई थप गुणस्तरीय निर्माण सामग्री उपलब्ध गराउन पाउँदा खुसी लागेको बताए ।

प्राइम एसोसिएट्सले विगत १८ वर्षदेखि नेपाली बजारमा अटोमोबाइल र कन्स्ट्रक्सन इक्विपमेन्टसम्बन्धी कारोबार गर्दै आएको छ ।

यस अनुसार, सडक विस्तारका लागि आवश्यक अस्फाल्ट प्लान्ट, पेभर्स, ब्रुमर, स्टोन क्रसर लगायतको कारोबार गर्दै आएको प्राइम एसोसिएट्सले कंक्रिटिङका लागि चाहिने सेल्फ लोडिङ मिक्सचर समेत उपलब्ध गराइरहेको छ ।

हाल विश्वका विभिन्न देशमा विटगन कम्पनीका उत्कृष्ट तथा विश्वसनीय उत्पादन सडक निर्माण तथा पुनःस्थापना कार्यका लागि बिक्री–वितरण भइरहेका छन् ।