अमेरिकी सेनाले दक्षिण अमेरिका नजिकै लागूऔषध तस्करहरूको डुङ्गामा आक्रमण गरेको छ  । आक्रमणमा ३ जनाको मृत्यु भएको राष्ट्रपति डोनाल्ट ट्रम्पले जानकारी दिएका हुन् । 

उनले सामाजिक सञ्जालमा पोस्ट गर्दै यी तस्करहरूलाई नार्को आतंकवादी अर्थात् लागूऔषध कार्टेलसँग सम्बन्धित आतंककारीहरू भनेर वर्णन गरेका छन् । 'मेरो आदेशमा अमेरिकी सेनाले लागूऔषध तस्करी कार्टेल र नार्को आतंककारीहरूमाथि प्रहार गर्‍यो । यी व्यक्तिहरू भेनेजुएलाबाट अमेरिकामा लागूऔषध लैजाँदै थिए,' उनले भनेका छन् । 

उनले  लागूऔषध कार्टेलहरू अमेरिकी राष्ट्रिय सुरक्षा, विदेश नीति र हितका लागि ठूलो खतरा भएकव बताए । ट्रम्पले यो आक्रमणमा अमेरिकी सेनालाई कुनै क्षति नभएको पनि बताएका छन् ।

दुई हप्ताअघि पनि अमेरिकी सेनाले भेनेजुएलाको कुख्यात ट्रेन डे अरागुआ गिरोहसँग सम्बन्धित ११ जनालाई मारेको दाबी गरेको थियो ।