गाजा सिटीमा इजरायली सेनाले कब्जा गर्ने उद्देश्यसहित ठूलो भूमिगत आक्रमण थालेपछि हजारौं प्यालेस्टिनीहरू पलायन हुन बाध्य भएका छन् । 

रातभरि भएको बमबारीमा हमासद्वारा सञ्चालित स्वास्थ्य मन्त्रालयले अल-रानितिसी बाल अस्पताललाई तीन पटक आक्रमण गरिएको र यसले आधा बिरामी तथा उनका परिवारलाई भाग्न बाध्य बनाएको जनाएको छ ।

इजरायली सेनाले दुई दिनमै गाजा सिटीभर १५० भन्दा बढी ‘आतंकवादी लक्ष्य’ भनिएका स्थानमा आक्रमण गरेको दाबी गरेको छ । 

उसको भनाइअनुसार, यो अपरेसनको लक्ष्य करिब ३,००० हमास लडाकूलाई पराजित गर्नु र बाँकी रहेका बन्धकहरूलाई मुक्त गर्नु हो । तर, आक्रमणले विश्वव्यापी आलोचना खेपिरहेको छ ।

संयुक्त राष्ट्रसहित २० भन्दा बढी राहत एजेन्सीहरूले गाजाको अवस्थालाई ‘अमानवीय र अकल्पनीय’ भन्दै तत्काल हस्तक्षेप गर्न आह्वान गरेका बीबीसीले जनाएको छ ।

हालसम्म करिब ३ लाख ५० हजार मानिस गाजा सिटीबाट भागेको इजरायली सेनाको दाबी छ भने संयुक्त राष्ट्रले यो संख्या १   लाख ९० हजार मात्र भएको जनाएको छ । अझै करिब ६ लाख ५० हजार मानिस त्यहाँ नै रहेको अनुमान छ ।

विस्थापित नागरिकले गधा, गाडी, रिक्सा, सामानले भरिएका ट्रक र पैदल यात्रा गरिरहेका छन् । सानो ट्रक भाडामा लिन ३,००० शेकेलसम्म लाग्ने र पाँच जनालाई बस्ने टेन्ट ४,००० शेकेल पर्न थालेपछि धेरैजना दक्षिणतर्फ जान नसकेको बताएका छन् । खान युनिस पुगेका केहीले ठाउँ नपाएपछि फेरि गाजा फर्किएको बताएका छन् ।

यसैबीच, हमासद्वारा कब्जामा रहेका बाँकी ४८ बन्धकका परिवारले (जसमा २० जना अझै जीवित भएको विश्वास गरिन्छ) इजरायली प्रधानमन्त्री बेन्जामिन नेतान्याहूको निवास नजिक प्रदर्शन गर्दै आक्रमणले आफ्ना प्रियजनलाई जोखिममा पारेको बताएका छन् ।

संयुक्त राष्ट्र मानव अधिकार प्रमुख भोल्कर टर्कले आक्रमणलाई ‘पूर्ण रूपमा अस्वीकार्य’ भनेका छन् भने बेलायतकी विदेशमन्त्री येभेट कुपरले ‘लापरबाहीपूर्ण र भयावह’ प्रतिक्रिया दिएका छन् । 

तर, अमेरिकाका विदेशमन्त्री मार्को रुबियोले इजरायलको अपरेसनलाई अप्रत्यक्ष समर्थन गर्दै ‘हमासजस्ता समूहसँग वार्ता सम्भव छैन’ भनेका छन् ।

संयुक्त राष्ट्र संघको अनुसन्धान आयोगले इजरायलले गाजामा नरसंहार गरेको निष्कर्ष निकालेको छ । प्रतिवेदनमा सुरक्षाबलले यौन तथा लिङ्ग आधारित हिंसा गरेको, बालबालिकालाई सिधै लक्षित गरेको र धार्मिक, सांस्कृतिक तथा शैक्षिक स्थलमाथि प्रणालीगत आक्रमण गरेको उल्लेख छ । इजरायलले भने यसलाई ‘झूटो र विकृत’ भन्दै अस्वीकार गरेको छ ।

गाजाको स्वास्थ्य मन्त्रालयका अनुसार ७ अक्टोबर २०२३ देखि हालसम्म इजरायली आक्रमणबाट ६४ हजार ९६४ जनाको ज्यान गइसकेको छ, जसमा करिब आधा महिला र बालबालिका छन् ।

संयुक्त राष्ट्र संघ समर्थित निकायले भोकमरीको चेतावनी दिँदै आक्रमण अझ बढेमा नागरिकलाई झन् गहिरो विपतमा धकेलिने जनाएको छ ।