२७ असार २०८३, शनिबार
नेकपा (एमाले) को पार्टी शुद्धीकरण, सुदृढीकरण, रूपान्तरण तथा पुनर्गठनसम्बन्धी कार्यदलले देशव्यापी सुझाव संकलन अभियानबाट प्राप्त सुझावका आधारमा प्रतिवेदनलाई अन्तिम रूप दिने जिम्मेवारी कार्यदलका संयोजक रामबहादुर थापा ‘बादल’ र महासचिव शंकर पोखरेललाई दिएको छ।
बिहीबार पार्टी केन्द्रीय कार्यालय च्यासलमा बसेको कार्यदलको बैठकले देशका १३ स्थानमा सञ्चालन गरिएको सुझाव संकलन कार्यक्रम सफलतापूर्वक सम्पन्न भएको निष्कर्ष निकाल्दै प्राप्त सुझावलाई समेटेर अन्तिम प्रतिवेदन तयार गर्ने निर्णय गरेको हो। बैठकमा एमाले अध्यक्ष केपी शर्मा ओली पनि सहभागी थिए।
एमाले प्रचार तथा प्रकाशन विभाग प्रमुख निरज आचार्यका अनुसार सुझाव संकलन अभियानबाट प्राप्त राय, सुझाव र निष्कर्षलाई समेटेर तयार गरिने प्रतिवेदनले पार्टीको भावी वैचारिक, राजनीतिक तथा सङ्गठनात्मक दिशा निर्धारणमा महत्वपूर्ण आधार तयार गर्नेछ। प्रतिवेदन अन्तिम भएपछि पार्टी नेतृत्वसमक्ष पेस गरिने उनले जानकारी दिए।
निर्वाचनपछिको समीक्षा, पार्टीको पुनर्ताजगीकरण तथा सङ्गठनलाई समयानुकूल रूपान्तरण गर्ने उद्देश्यले गठन गरिएको कार्यदलले देशभर नेता–कार्यकर्ता, जनप्रतिनिधि, जनसङ्गठनका प्रतिनिधि तथा शुभेच्छुकसँग प्रत्यक्ष छलफल गर्दै सुझाव संकलन गरेको थियो। कार्यदलका अनुसार प्राप्त सुझाव पार्टी शुद्धीकरण, सङ्गठन सुदृढीकरण, नेतृत्व विकास, कार्यशैली सुधार र जनतासँगको सम्बन्ध थप मजबुत बनाउने विषयमा केन्द्रित छन्।
बैठकले सुझाव संकलन कार्यक्रम सफल बनाउन सहयोग गर्ने प्रदेश, जिल्ला तथा सम्बन्धित पार्टी कमिटीलाई धन्यवाद ज्ञापन गर्नुका साथै अभियानमा सहभागी भई सुझाव दिने नेता–कार्यकर्ता, शुभेच्छुक र सरोकारवालाप्रति आभार व्यक्त गरेको छ।
कार्यदलले देशभरबाट प्राप्त सुझाव पार्टी पुनर्गठनको भावी कार्ययोजना निर्माणका लागि महत्वपूर्ण आधार बन्ने विश्वास व्यक्त गर्दै प्रतिवेदनका आधारमा पार्टी शुद्धीकरण, सुदृढीकरण, रूपान्तरण तथा पुनर्गठनका कार्यक्रम व्यवस्थित रूपमा अघि बढाइने जनाएको छ।
