१६ असार २०८३, मंगलबार
चीनको सबैभन्दा ठूलो विद्युतीय सवारी साधन निर्माता कम्पनी बीवाईडीले आफ्नो पूँजी २०० प्रतिशतले बढाएको छ ।
बीवाईडीले आफ्ने पूँजी ३.०३ अर्ब युआनबाट २०० प्रतिशतले बढाएर ९.११ अर्ब युआन पुर्याएको हो । कम्पनीले ४२ करोड ६० लाख अमेरिकी डलर रहेको पूँजीलाई करिब २०० प्रतिशतले बढाएर १ अर्ब २८ करोड अमेरिकी डलर पुर्याएको आईटी–होमको रिपोर्टले देखाएको हो ।
यसअघि मे २०२५ मा, कम्पनीले आफ्नो पूँजी २.९०९ अर्ब युआन (४० करोड ७० लाख अमेरिकी डलर) बाट ३.०३९ अर्ब युआन (४२ करोड ६० लाख अमेरिकी डलर) मा बढाएको थियो ।
सन् २०२२, २०२३ र २०२४ मा सर्वाधिक गाडी विक्री गर्दै कीर्तिमानी कायम गरेको बीवाईडीले सन् २०२५ का लागि ५५ लाख कार बिक्री गर्ने वार्षिक लक्ष्य निर्धारण गरेको छ ।
कम्पनीले २०२५ को पहिलो अर्धवार्षिक समयसम्म १५.५११ अर्ब युआन (२ अर्ब १७ करोड अमेरिकी डलर)को खुद नाफा आर्जन गरेको रिपोर्टले देखाएको छ । कम्पनीको सञ्चालन मुनाफा भने ३७१.२८१ अर्ब युआन (५२ अर्ब अमेरिकी डलर)को रहेको छ ।
कम्पनीले अनुसन्धान तथा विकासमा मात्रै ३०.९ अर्ब युआन (४ अर्ब ३३ करोड अमेरिकी डलर) गरेको देखिन्छ । अन्तर्राष्ट्रिय बजारबाट कम्पनीको आम्दानी १३५.३५८ अर्ब युआन (१९ अर्ब अमेरिकी डलर)सम्म पुगेको आँकडा छ ।
अन्तर्राष्ट्रिय बजारको कूल बिक्री मात्राको बीवाईडीले ३६.५ प्रतिशत हिस्सा ओगटेको रिपोर्टले देखाएको छ ।
सन् २०२५ को जनवरीदेखि अगस्टसम्म कम्पनीले २८ लाख ६४ हजार गाडीको बिक्री गर्दै नयाँ रेकर्ड कायम गरेको थियो । जुन सन् २०२४ को सोही अवधिको तुलनामा २३ प्रतिशतले बढी हो ।
अहिले कम्पनीले २०२५ को लागि ५५ लाख कार बिक्री गर्ने वार्षिक लक्ष्य निर्धारण गरेको छ । यो लक्ष्यमा पुग्नका लागि कम्पनीले सेप्टेम्बरदेखि डिसेम्बरसम्म प्रतिमहिना औसत ६ लाख ६० हजार सवारीसाधन बिक्री गर्नुपर्नेछ ।
सन् १९९५ मा स्थापित बीवाईडी लिथियम–आयन ब्याट्रीहरूको लागि विश्वसनीय मानिन्छ । बीवाईडीले यसबाहेक पनि अन्य प्रकारका ब्याट्री, चार्जर, इलेक्ट्रोनिक उत्पादन र तिनका सामान उत्पादन र बिक्री गर्दै आएको छ ।
