चीनतर्फका प्रमुख दुई नाका रसुवागढी र तातोपानीमा महिनौंदेखिको अवरोधका बीच मुस्ताङको कोरला नाका विकल्पका रूपमा प्रयोग हुन थालेको छ ।

गएको भदौ ३० देखि विकल्पका रूपमा मुस्ताङ भन्सार कार्यालय, नेचुङ (कोरला नाका)प्रयोग भइरहेको हो ।

यसबीचमा मंगलबारदेखि तातोपानी नाका पनि सञ्चालनमा आएको छ । अरनिको राजमार्ग अन्तर्गत कोदारीमा १८ दिनपछि पहिरो पन्छ्याएर बाटो खुलाइएको हो । यसै बाटोका कारण तातोपानी नाकाबाट आयात निर्यात ठप्प थियो ।

अहिले बाटो खुलेपनि मालबाहक गाडीहरू भन्सार कार्यालयसम्म नआएको तातोपानी भन्सार कार्यालयका प्रमुख राजेन्द्रप्रसाद चुडालले जानकारी दिए ।

नेपालबाट खाली कन्टेनरहरू मात्रै चीनतर्फ गएको तर, मालवाहक कन्टेनरहरू नेपालतर्फ नआएको उनको भनाइ छ । 

‘सोमबारदेखि बाटो एकतर्फी खुलेको छ । यहाँबाट खाली गाडीहरू गएका छन्’, उनले भने, ‘तर मालवाहक गाडीहरू भन्सारमा आइपुगेका छैनन् । बाटो थोरै बनाउनुपर्ने भएकाले काम भइरहेको छ ।’

व्यवसायीहरूले दुई महिनादेखि चीनका विभिन्न स्थानमा अलपत्र परेका सामानसहितका कन्टेनर री–रुट गरी मुस्ताङको कोरला नाकामा पुर्‍याएर नेपालतर्फ भित्र्याइरहेको नेपाल राष्ट्रिय व्यवसायी महासंघका अध्यक्ष हेमलाल खरालले जानकारी दिए । अहिलेसम्म कोरला हुँदै ५० देखि ६० मालवाहक ट्रक नेपाल भित्रिएको उनको भनाइ छ । 

२०८० सालमा नै सञ्चालनमा आएको मुस्ताङ भन्सार कार्यालय, नेचुङ (कोरला नाका) भदौ ३० गतेदेखि पूर्णरूपमा प्रयोगमा आएको हो । यसअघि आयात निर्यातका लागि ठप्प रहेको, तर जिल्ला प्रशासन कार्यालयबाट जारी भएको प्रवेश अनुमति पत्रका आधारमा केही सामान वारपार हुने गरेको थियो ।

गत भदौ २१ गते भन्सार विभागले कर्मचारी नै खटाएर भन्सार कार्यालयलाई पूर्णरूपमा सञ्चालन गर्न निर्देशन दिएको थियो । 

अहिले मुस्ताङ हुँदै चीनतर्फका गाडीहरू नेपाल भित्रिने भएपछि कोरला नाकाबाट १० किलोमिटर नेपालतर्फ रहेको भन्सार कार्यालयबाट जाँचपासको काम भइरहेको उनले बताए । 

दशैंतिहारलाई लक्षित गरी ल्याइएका मालवाहक कन्टेनर चीनको विभिन्न स्थानमा अलपत्र परेका थिए । ती कन्टेनरलाई री–रुट गरी कोरला नाका हुँदै भित्र्याउने काम भइरहेको छ ।

कन्टेनरमा फलफूल, लसुन, जुत्ता, तयारी पोशाक, हल्का ज्याकेट र जर्सी, बेल्ट, घडी, खेलकुदका सामान, कस्मेटिक्स, तन्ना, रेडिमेड डसना, तिहारमा बाल्ने झिलिमिली विद्युतीय बत्तीसहित विद्युतीय उपकरणलगायतका सामानहरू रहेका छन् । 

विशेष गरी वर्षभरि सुस्त चलिरहने बजार दशैं, तिहार र छठ पर्वको समयमा बढी चलायमान हुने गर्दछ । यस वर्ष भने सबैभन्दा बढी बिक्री हुने समयमा नयाँ सामान नआउँदा व्यवसायी मारमा छ । 

यसरी मुस्ताङको कोरला नाकाबाट कन्टेनर ल्याउँदा  डेढदेखि दुई लाख अतिरिक्त खर्च लाग्ने व्यवसायीहरूको भनाइ छ । कोरला नाका हुँदै पोखरा भएर काठमाडौं ल्याउनका लागि ४ देखि ५ दिन लग्ने व्यवसयाीहरू बताउँछन् ।

यता काठमाडौंका प्रमुख र ठूला होलसेल बजारहरूमा नयाँ सामान नै नआएपछि पुरानै स्टकहरू चलाइरहेका छन् ।

दशैं तिहारमा तथा हिउँदका लागि उपभोग हुने सामानमध्ये करिब ७० प्रतिशत चीनबाट आयात हुने गरेको छ । त्यसमा पनि पछिल्लो दुई महिनादेखि चीनका प्रमुख नाकामा बाटो अवरुद्ध भएपछि भरिया लगाएर भए पनि व्यवसायीहरूले केही मात्रामा सामान ल्याएका थिए ।

काठमाडौंका प्रमुख होलसेल बजार महाबौद्ध खिचापोखरी, न्युरोड, इन्द्रचोक, भोटाहिटी, जमल लगायतका स्थानमा व्यवसायीहरूले अहिले पुरानै सामान बिक्री गरिरहेका छन् ।

बजारलाई चलायमान बनाउन आवश्यक पर्ने सामानका कन्टेनर अहिले पनि सहज रूपमा नेपाल भित्रिन पाएका छैनन् ।

यता तातोपानी नाका हुँदै भित्रिने गाडीहरू पहिरोका कारण रोकिएपछि दैनिक १ हजार ५ सयदेखि २ हजारको संख्यामा भरियाहरू खटिएर केही सामान नेपाल भित्र्याउँदै आएका थिए ।

सडक मार्ग अवरुद्ध हुँदा तिज, दशैं र तिहारलक्षित ५ सयभन्दा बढी कन्टेनर केरुङमा र तातोपानीमा १ हजार ६ सय सामान बोकेका कार्गो कन्टेनर चीनको ल्हासा–न्यालममा रोकिएका छन् । 

अहिले मुस्ताङबाट सामान भित्रिँदै आएपनि काठमाडौं भित्रिनका लागि पृथ्वीराजमार्गमा पहिरो गएका कारणले समयमै समान आइनपुग्ने व्यवसायीहरू बताउँछन् ।