२७ असार २०८३, शनिबार
इस्लाम धर्मगुरू पैगम्बर मोहम्मदका बारेमा गलत टिप्पणी गरिएको भन्दै भारतको जोगवनीमा विरोध शुरू भएको छ ।
हिन्दू समुदायले पैगम्बरका बारेमा सामाजिक सञ्जालमा गलत टिप्पणी गरेको भन्दै मुस्लिम समुदाय विरोधमा उत्रिएपछि जोगवनीको अवस्था तनावग्रस्त छ । बजरंग दलका युवा आइपुगेपछि मुस्लिम र हिन्दू समुदायबीच झडप भएको स्थानीयले बताएका छन् ।
जोगवनी विराटनगरको सीमावर्ती बजार हो । दशैंकालगायतका चाडबाडमा यो बजारमा अत्यधिक भिड हुने गर्छ। जोगवनी नेपालीको किनमेल गर्ने मुख्य बजार हो ।
जोगवनी तनावग्रस्त भएपछि किनमेलका लागि पुगेका नेपालीबीच भागदौड मच्चिएको थियो ।
किनमेलका लागि गएकाहरू भागेर नेपाल फर्किएका छन् । अवस्था असामान्य बनेपछि जोगवनी प्रवेश गर्ने नेपाल–भारत सीमा नाका बन्द गरिएको छ ।
जोगवनीमा तनाव भएपछि सीमा नाका तत्काललाई बन्द गरिएको मोरङका प्रमुख जिल्ला अधिकारी इन्द्रदेव यादवले बताए ।
अवस्था सामान्य बनेपछि आवतजावत शुरू हुने उनले जानकारी दिए ।
घटनापछि रानी नाकामा अहिले ठूलो संख्यामा नेपाल र सशस्त्र प्रहरीसहितका सुरक्षाकर्मी परिचालन गरिएको छ ।
