०६ साउन २०८३, बुधबार
गृह मन्त्रालयले अख्तियार दुरुपयोग अनुसन्धान आयोगमा कार्यरत नेपाल प्रहरीको अनुसन्धान टोलीमा व्यापक फेरबदल गरेको छ । डीआईजीको नेतृत्व परिवर्तनसँगै एसपी, डीएसपी र इन्स्पेक्टरसहित एक दर्जनभन्दा बढी प्रहरी अधिकारीलाई आयोगबाट फिर्ता बोलाउँदै नयाँ टोली खटाइएको छ ।
गृह मन्त्रालयले अख्तियारमा कार्यरत डीआईजी शेखर खनाललाई नेपाल प्रहरी प्रधान कार्यालयको कार्य विभागमा सरुवा गरेको छ । कार्य विभागमा रहेका डीआईजी अरुण पौडेललाई भने अख्तियारमा पठाइएको छ ।
डीआईजीको सरुवासँगै आयोगमा काजमा रहेका एसपी मोहन थापालाई पनि फिर्ता बोलाइएको छ । उनको स्थानमा संयुक्त राष्ट्रसंघ (यूएन) शाखामा कार्यरत एसपी सुधिरराज शाहीलाई खटाइएको छ ।
फिर्ता बोलाइएका डीएसपीहरूमा उमेश लम्साल, मदनजित महरा, गौतम थापा, दीपककुमार कार्की र भीम खड्का छन् । त्यस्तै, इन्स्पेक्टरहरु क्रमश: ज्ञानमञ्जरी शर्मा, हिमबहादुर केसी, किशोर केसी, सुजन पाठक, रामजी देवकोटा, फुलमाया घिसिङ, साकारराज पन्त, श्यामसुन्दर पाठक र उमेश श्रेष्ठलगायतलाई पनि आयोगबाट फिर्ता गरिएको छ ।
प्रहरी प्रधान कार्यालय स्रोतका अनुसार यो नियमित सरुवा नभई अख्तियारमा कार्यरत प्रहरी टोलीको पुनर्गठन गर्ने उद्देश्यले गरिएको व्यापक फेरबदल हो ।
गृहमन्त्री सुधन गुरुङको निर्देशनपछि गृह मन्त्रालय र नेपाल प्रहरी प्रधान कार्यालयले समन्वय गरेर नेतृत्वदेखि अनुसन्धान टोलीसम्म एकैपटक हेरफेर गरेको हो । भ्रष्टाचार मुद्दा एवं आर्थिक अनियमिततासम्बन्धी अनुसन्धानको कार्यसम्पादन र प्रभावकारितामाथि प्रश्न उठेपछि अख्तियारमा कार्यरत प्रहरी टोलीमा व्यापक फेरबदल गरिएको हो ।
‘अख्तियारमा कार्यरत प्रहरी संरचनाको यस प्रकारको सामूहिक हेरफेर सामान्य होइन’, प्रहरी प्रधान कार्यालयका एक उच्च अधिकृतले लोकान्तरसँग भने, ‘अख्तियारको अनुसन्धानको सूचना बाहिरिन थालेपछि लामो समय काम गरेकालाई हटाइएको हो ।’
