२५ जेठ २०८३, सोमबार
जेनजी अगुवाहरूले सामाजिक सञ्जालमा ‘एरेस्ट केपी ओली-रमेश लेखक’ अभियान चलाएका छन् ।
उनीहरूले सोमबार निवर्तमान प्रधानमन्त्री केपी शर्मा ओली र निवर्तमान गृहमन्त्री रमेश लेखकलाई पक्राउ गर्न भन्दै अभियान चलाएका हुन् ।
गत भदौ २३ गते जेनजी आन्दोलनमा राज्यको तर्फबाट दमन भएको र धेरै युवाको हताहती भएको भन्दै तत्कालीन सरकारका प्रतिनिधिलाई पक्राउ गरिनुपर्ने उनीहरूको माग छ ।
जेनजी अगुवा रक्षा बमले अधिकार माग्न गएका विद्यार्थीहरूमाथि गोली दागिएको तानाशाहीपनको हिसाब हुनुपर्ने बताएकी छिन् ।
'अधिकार माग्न गएका निहत्था विध्यार्थीहरूमाथि जुन दम्भ र अहंकारले गोली दागियो, त्यो तानाशाहीपनको हिसाब हुनु जरुरी छ,' उनले लेखेकी छिन्, 'मधेश विद्रोह हुँदा दुई/चार दाना कुहिएका आँप झरेका हुन् भन्ने अभिव्यक्ति दिने, सेप्टेम्बर ८ को आन्दोलनमा निहत्था कलिला विध्यार्थीहरूमाथि गोली दाग्न आदेश दिने, एक व्यक्ति आज पनि जग हसाउँदै चुट्किला सुनाएर बसिरहेको छ । हत्याराहरूलाई कारबाहीको दायरामा ल्याइयोस् ।'
यस्तै, हामी नेपालका सुधन गुरुङले पनि राष्ट्रका लागि गर या मर भन्दै ओली र लेखको तस्वीर राख्दै अभियान चलाएका छन् ।
