जेनजी अगुवा रक्षा बमले आगामी निर्वाचनलाई प्रतिस्पर्धा र अवसरको रूपमा लिन आग्रह गरेकी छिन् ।

उनले शनिबार सामाजिक सञ्जालमार्फत आफ्ना विचार, दृष्टि र कार्यनीतिका माध्यमबाट जनतासमक्ष आउन राजनीतिक दललाई आग्रह गरेकी हुन् ।

'लोकतन्त्र निरन्तर सुधार र पुनर्जीवनको प्रक्रिया हो । जनताको असन्तोष, युवापुस्ताको विद्रोह र परिवर्तनको मागलाई संस्थागत रूप दिन सक्नु लोकतन्त्रकै सफलता हो । त्यसैले, हामी सम्पूर्ण राजनीतिक दलहरूलाई आगामी निर्वाचनलाई प्रतिस्पर्धा र अवसरको रूपमा लिन आग्रह गर्दछौं । आफ्ना विचार, दृष्टि र कार्यनीतिहरूका माध्यमबाट जनतासमक्ष आउनुहोस् । निर्वाचन जनताको निर्णायक मञ्च हो । निर्वाचनबाटै पुराना गल्तीहरूको आत्मसमीक्षा र नयाँ प्रतिबद्धताको प्रस्तुति सम्भव हुन्छ,' उनले भनेकी छिन् ।​​

जेनजी विद्रोहले कुनै दललाई अस्वीकार नगरेको पनि उनले स्पष्ट पारेकी छिन् ।

'जेनजी विद्रोहले कुनै दललाई अस्वीकार गरेको होइन, छैन । यस विद्रोहले दलभित्र विकसित भइरहेको जनताको आवाज बेवास्ता गर्ने प्रवृत्तिलाई अस्वीकार गरेको हो । हामी राजनीतिक दलहरूलाई वैचारिक प्रतिस्पर्धा र जनसेवामूलक प्रतिस्पर्धाको बाटोमा फर्किन आग्रह गर्दछौं । निर्वाचन केवल सत्ता हस्तान्तरणको प्रक्रिया होइन । राजनीतिक दलका लागि यो नयाँ पुस्तासँग सम्झौता गर्ने अवसर हो । जनताको विश्वास पुनः प्राप्त गर्ने माध्यम हो । साथै, देशको राजनीतिक दिशा पुनर्संरचना गर्ने क्षण पनि हो,' उनले भनेकी छिन् ।

जेनजीहरू बहुदलीय लोकतान्त्रिक व्यवस्थाका पक्षधर भएकाले विभिन्न राजनीतिक दलहरूले निर्वाचनमार्फत सार्वभौम जनताबाट म्यान्डेट लिनु प्रणालीको सुन्दर पक्ष रहेको उनले भनेकी छिन् ।

'हामी बहुदलीय लोकतान्त्रिक व्यवस्थाका पक्षधर हौं। विभिन्न राजनीतिक दलहरूले निर्वाचनमार्फत सार्वभौम जनताबाट म्यान्डेट लिनु हाम्रो प्रणालीको सुन्दर पक्ष हो । यही नै लोकतन्त्रको आत्मा हो । तर, विगतका संसद् र सरकारहरूले जनताको आस्था गुमाए,' उनले भनेकी छिन् ।