इरानले इजरायलमाथि भइरहेका सैन्य आक्रमणहरू तत्कालका लागि रोक्ने घोषणा गरेको छ। 

गत अप्रिल महिनायता पहिलो पटक यी दुई देशबीच प्रत्यक्ष रूपमा ठुलो मात्रामा गोलाबारी भएपछि इरानको तर्फबाट यस्तो घोषणा आएको हो।

यद्यपि, इरानी सैन्य कमान्डले इजरायलले लेबनानको दक्षिणी क्षेत्रमा आफ्नो सैन्य कारबाही जारी राखेमा त्यसको अझ गम्भीर र शक्तिशाली जवाफ दिने चेतावनी समेत दिएको छ।

इरानको सैन्य कमान्ड 'खातम अल-अम्बिया' केन्द्रीय मुख्यालयले एक विज्ञप्ति जारी गर्दै सशस्त्र बलका तर्फबाट इजरायल लक्षित अपरेसनहरू स्थगित गरिएको जानकारी दिएको छ।

 इरानले आइतबार इजरायली सैन्य ठेगानाहरूमा मिसाइल प्रहार गरेपछि इजरायलले पनि इरानको पश्चिमी र केन्द्रीय क्षेत्रमा हवाई आक्रमण गरेको थियो। इरानले लेबनानको राजधानी बेरुतमा इजरायलले गरेको आक्रमणको बदलास्वरूप यो सैन्य कारबाही सुरु गरेको बताएको थियो।