नेपाल वायुसेवा निगमले जहाज खरिदको किस्ता बापत ५३ करोड ९ लाख ५५ हजार रुपैयाँ बुझाएको छ ।

निगमले जहाज खरिदबापत दुई सरकारी कोषलाई ५३ करोड ९ लाख ५५ हजार २८१ रुपैयाँ भुक्तानी गरेको हो । निगमले कर्मचारी सञ्चय कोष र नागरिक लगानी कोषबाट लिएको ऋण दायित्व मध्ये यो रकम बुझाएको हो ।

अन्तर्राष्ट्रिय उडानका लागि खरिद गरिएका दुई न्यारोबडी र दुई वाइडबडी जहाजका लागि कर्मचारी सञ्चय कोष र नागरिक लगानी कोषबाट ऋण लिएको थियो । जसमा दुई न्यारोबडी जहाजको निगमले असोज मसान्तसम्मको किस्ता बापत पूरा र दुई वाईडबडी जहाजको आंशिक गरी शुक्रबार उक्त रकम भुक्तानी गरेको हो ।

निगमले जहाज खरिदसम्बन्धी ऋण दायित्व शीर्षकअन्तर्गत २०८२ असोज मसान्तसम्मको अवधिमा कुल ८ अर्ब ४५ करोड २४ लाख १८ हजार ६५७ रुपैयाँ किस्ता रकम भुक्तानी गरिसकेको जनाएको छ ।

विश्वव्यापी कोभिड-१९ महामारीका कारण निगमको व्यापारमा समेत प्रतिकूल असर परेकाले सो अवधिको ब्याजको ब्याज, हर्जाना र पेनल छुट गरी सहयोग गरिदिन एवं किस्ताको संख्या बृद्धि गरेर ऋण दायित्व भुक्तानीलाई सहजीकरण गरिदिन कर्मचारी सञ्चय कोष तथा नागरिक लगानी कोषलाई अनुरोध पत्र समेत निगमले पठाएको छ । 

जसमा सकारात्मक छलफल समेत भइरहेको र तालुकदार निकायलगायत नेपाल सरकारबाट आवश्यक सहयोग एवं सहजीकरणका लागि निगमले अनुरोध गरेको छ ।