लुम्बिनी प्रदेशसभामा कार्यकालको आधा समयपछि जनमत पार्टीबाट ‘भाग्य’ले नीलम पासवान सांसद बनेकी छिन् । जनमतबाट समानुपातिक सांसद रहेकी गीता गुरुङले पारिवारिक कारण देखाउँदै राजीनामा दिएपछि दलित महिला नीलमलाई संसद् प्रवेशको ढोका खुलेको हो । शुक्रबार प्रदेशसभाका सभामुख तुलाराम घर्ती मगरसमक्ष शपथ ग्रहण गरेकी पासवानलाई आधा कार्यकालपछि अहिले आएर सांसद बन्छु भन्नेसम्म पनि लागेको थिएन ।

सीके राउत नेतृत्वको जनमत पार्टीले सांसद गुरुङ प्रदेशसभा बैठकमा उपस्थित नभई विदेश पलायन भएपछि रिक्त उक्त ठाउँमा पासवानलाई पठाएको हो ।

समानुपातिक सूचीमा पासवानको नाम चार नम्बरमा थियो । घरायसी कामकाजका साथै पासवान लुम्बिनी बौद्ध विश्वविद्यालयमा स्नातक तह तेस्रो वर्षमा अध्ययनरत छिन् ।

रुपन्देहीको लुम्बिनी सांस्कृतिक नगरपालिका वडा नम्बर–३ पडरिया निवासी ३२ वर्षिया सांसद पासवान पार्टी स्थापनाकाल (६ वर्षअघि)देखि जनमतमा आबद्ध थिइन् । ‘पार्टीको समानुपातिक कलस्टरमा मेरो चौथो नम्बरका नाम थियो,’ उनी भन्छिन्, ‘तेस्रो नम्बर रहनुभएकी जनजाति महिला गीता गुरुङ सांसद बन्नुभयो, म बन्न पाइँन । उहाँले राजीनामा गरेपछि मैले अवसर पाएँ । यो बेला सांसद बन्छु भन्ने सोचेको थिइँन । भाग्य भनौं या संयोग सांसद बन्ने अवसर मिल्यो । यो मेरा लागि अवसरसँगै जिम्मेवारी पनि हो ।’

युवा सांसद पासवानलाई केही गर्छु भन्ने उत्साह पनि छ । ‘राजनीतिमा कुन बेला अवसर जुर्ने रहेछ भन्ने थाहा नपाइने रहेछ, देशमा हरेक वर्षमा युवाले नेतृत्व गर्नुपर्ने आवश्यक छ,’ उनले लोकान्तरसँग भनिन्, ‘मलाई पनि यस्तो बेलामा अवसर आएको छ । जनताको सेवामा काम गर्न संसद्‌मा युवाका आवाज उठाउने सोचेकी छु ।’

तराईका दलित महिलाहरूलाई नेतृत्व तहमा ल्याउन प्रदेशसभामा आवाज उठाउने उनको योजना छ ।  'तराई मधेशमा महिला, त्यसमा पनि दलित महिला धेरै पछाडि परेका छन्, उनीहरूलाई नेतृत्व तहमा ल्याउन सदनमा आवाज उठाउनुपर्ने आवश्यकता छ,' उनले भनिन् ।

संसद्‌मा पहिलो अनुभव लिएर काम गर्दै अघि बढ्ने उनले सुनाइन् ।

जनताको सेवा, तराई क्षेत्रका महिलाको सशक्तीकरण, शिक्षा र सामाजिक विकासको क्षेत्रका काम गर्ने सोच बनाएको उनले बताइन् ।

पार्टीमा उनले इमानदार, निष्ठावान, मेहनती नेतृको रूपमा पहिचान बनाएको पार्टी प्रदेशसभा संसदीय दलका नेता तथा पूर्वमन्त्री सीके गुप्ताले बताए । ‘शिक्षित व्यक्ति पनि हो, उहाँ र उहाँको श्रीमान् विनोदकुमार पासवान शुरूआतदेखि नै पार्टीमा सक्रिय र क्रियाशील हुनुहुन्छ । यो बेला मान्यज्यूले राजीनामा दिएपछि उहाँलाई सांसद बन्ने संयोग मिल्यो,’ सांसद गुप्ताले लोकान्तरसँग भने ।

८७ सदस्यीय लुम्बिनी प्रदेशसभामा जनमत पार्टीबाट ३ जना सांसदको प्रतिनिधित्व छ । जसमध्ये १ जना प्रत्यक्ष निर्वाचित र दुई जना समानुपातिक हुन् ।