१४ असार २०८३, आइतबार
अभियन्ता भनिएका निकोलस भुसालको नेतृत्वमा आज माइतीघरमा गर्ने भनिएको प्रदर्शनलाई प्रहरीले हस्तक्षेप गर्ने भएको छ ।
जिल्ला प्रशासन कार्यालयबाट स्वीकृति नलिई आफूखुसी प्रदर्शनको घोषणा गरेकाले प्रहरीले हस्तक्षेप गर्ने तयारी गरेको जानकारी जिल्ला प्रहरी परिसर काठमाडौंका प्रवक्ता एवं प्रहरी उपरीक्षक पवन भट्टराईले दिए ।
उनका अनुसार प्रशासनको स्वीकृतिबेगर जसले गर्ने प्रदर्शन, विरोध र्याली वा जुलुसलाई पनि प्रहरीले हस्तक्षेप गर्छ ।
‘निकोलसले गर्ने कार्यक्रमबारे प्रशासन जानकार छैन, स्वीकृति नलिई गरिएका त्यस्ता प्रदर्शनलाई प्रहरीले हस्तक्षेप गर्छ, ’ भट्टराईले लोकान्तरसँग भने, ‘प्रदर्शनमा आउनेलाई प्रहरीले नियन्त्रणमा लिन्छ ।’
प्रहरीले यसअघि निकोलसलाई नियन्त्रणमा लिएको थियो । उनले गाँजा सेवन गरेको स्वास्थ्य रिपोर्ट आएपछि सुधार गृह राख्ने गरी परिवारलाई बुझाइएको थियो।
परिवारले सुधार गृह राख्न नसकेपछि निकोलस पुन: सार्वजनिक कार्यक्रममा सरकारको विरोध गरिरहेका छन् ।
