राष्ट्रिय स्वतन्त्र पार्टी (रास्वपा)का सभापति रवि लामिछानेको मुद्दामा उच्च अदालतले जिल्लाको फाइल झिकाउने आदेश गरेको छ ।

उच्च अदालत तुलसीपुरको बुटवल इजलासका न्यायाधीश वासुदेव आचार्य र न्यायाधीश ओम प्रकाश अर्यालको इजलासले रुपन्देही जिल्ला अदालतले गरेका आदेश र मिसिलसम्बन्धी फाइल मगाउने आदेश गरेको अदालतका सूचना अधिकारी रामबहादुर कुँवरले लोकान्तरलाई जानकारी दिए ।

रवि र गोर्खा मिडियाका तत्कालीन सञ्चालक एवं पूर्व डीआईजी छविलाल जोशीको निवेदनलाई एक साथ राखेर हेरिएको थियो ।

रविले बिगो बराबरको रकम धरौटी राखेर थुनामुक्त गर्न माग गर्दै निवेदन दिएका थिए । जिल्लाले यसरी थुनामुक्त गर्न अस्वीकार गरेपछि उनले उच्चमा समेत निवेदन दिएका हुन् ।​

बुटवलस्थित सुप्रिम बचत तथा ऋण सहकारी संस्थाको बचत अपचलनमा लामिछानेसहितका प्रतिवादीलाई १० करोड रुपैयाँ सामूहिक बिगो कायम गरेर अभियोगपत्र दायर गरिएको छ । जेनजी प्रदर्शनका क्रममा उच्च अदालत तुलसीपुरको बुटवल इजलासमा आगजनी र तोडफोड भए पनि लामिछाने र जोशी दुवैको फाइल बचेको थियो ।