२४ जेठ २०८३, आइतबार
नेपाली फिल्म ‘झरीपछिको इन्द्रेणी’ दक्षिण कोरियामा प्रदर्शन हुने भएको छ।
प्रदीप भट्टराईको नेतृत्व तथा व्यवस्थापनमा दक्षिण कोरियामा केही दिनभित्रै फिल्म प्रदर्शन हुन लागेको हो ।
नेपालमा आधिकारिक सम्झौता भएसँगै दक्षिण कोरियामा फिल्म प्रदर्शनको तयारी थालिएको भट्टराईले जानकारी दिए ।
परदेशी जीवन, संघर्ष, पारिवारिक भावना तथा आशाको सन्देश बोकेको फिल्म ‘झरीपछिको इन्द्रेणी’ले कोरियामा रहेका नेपाली दर्शकहरूको साथ पाउने उनको विश्वास छ ।
'यो कुनै व्यक्तिगत वा सीमित समूहको कार्यक्रम होइन, कोरियामा रहनुभएका सम्पूर्ण नेपाली समुदायका लागि हो। सबै सहयोग, व्यवस्थापन र जिम्मेवारी मेरो तर्फबाट हुनेछ,' भट्टराईले भने ।
दक्षिण कोरियामा रहेका नेपाली संघ–संस्था, बुद्धिजीवी, श्रमिक, विद्यार्थी तथा सम्पूर्ण नेपालीहरूलाई फिल्म हेरेर नेपाली चलचित्र क्षेत्रलाई हौसला प्रदान गर्न उनले आग्रह गरेका छन् ।
नेपाली चलचित्रलाई विदेशमा समेत व्यवस्थित र मर्यादित रूपमा प्रस्तुत गर्ने यो प्रयासले कोरियामा नेपाली कला र संस्कृतिको प्रवर्द्धनमा सकारात्मक योगदान पुर्याउने अपेक्षा गरिएको छ।
