अष्ट्रेलियाको सिड्नीमा उद्यमी तथा समाजसेवीका रूपमा परिचित महेश प्रसाईं ‘म्याक्स बाबु’ले नयाँ वर्षको अवसरमा नयाँ गीत सार्वजनिक गरेका छन्। रचना रिमालले स्वर दिएको उनको ‘लाग्छ सरमै’ बोलको गीत दर्शक–श्रोतामाझ आएको हो ।

सिड्नीका नेपाली सांस्कृतिक कार्यक्रमहरूमा निरन्तर प्रस्तुति दिँदै आएका म्याक्स बाबु कुशल परफर्मरका रूपमा समेत परिचित छन् । सार्वजतिक गीत ‘लाग्छ सरमै’कै भिडियोमा नायिका गरिमा शर्मासँग उनैले अभिनय गरेका छन् । कला र सिर्जनशीलतालाई जीवन यात्रासँग जोड्दै आएका उनले यो सांगीतिक प्रस्तुतिले नेपाली गीत–संगीत क्षेत्र र नेपाली समुदायमा विशेषस्थान बनाउने विश्वास व्यक्त गरे ।

युवा अवस्थामा अष्ट्रेलिया पुगेका म्याक्स बाबुले सिड्नीमा आयोजना भएका सन् १९७४ एडीदेखि हालसम्मका विभिन्न सांगीतिक कार्यक्रममा नेपालका ख्यातिप्राप्त गायक–गायिका तथा कलाकारहरूसँग दर्जनौं पटक मञ्च साझा गरिसकेका छन् । गीत–संगीतसँगै हास्य क्षेत्रमा पनि सक्रिय रहँदै आएका उनले मह जोडीसँग समेत आफ्नो प्रस्तुति दिइसकेका छन् ।

दुई दशकदेखि अष्ट्रेलियामा बसोबास गर्दै आएका म्याक्स बाबुले सिड्नीको आइकोनिक थिएटर, राउण्ड हाउसजस्ता ठूला इभेन्टहरूमा प्रस्तुति दिएका छन् । पछिल्लो समय नेपाली चलचित्र ‘पीआर’ मा समेत उनको अभिनय देख्न सकिन्छ । 

कुन्ती मोक्तान, रामकृष्ण ढकाल, शिव परियार, रचना रिमाल, समीक्षा अधिकारीलगायत चर्चित कलाकारसँग मञ्च साझा गरिसकेका म्याक्स बाबु आफ्नो नयाँ गीतले युवा पुस्तादेखि वृद्धवृद्धासम्मको मन जित्नेमा आशावादी छन् ।

पूर्वी नेपालको ताप्लेजुङमा जन्मिएका म्याक्स बाबु सन् २००८ मा विद्यार्थीका रूपमा अष्ट्रेलिया गएका थिए । प्रारम्भिक संघर्षपछि निरन्तर मिहिनेत र आत्मविश्वासका साथ उनले सन् २०१५ मा सिड्नीको रकडेलमा ‘एभरेष्ट बुचरी’ स्थापना गरेका थिए । दशकभन्दा बढी समयदेखि व्यवसाय गर्दै आएका उनले हालै ‘कन्ट्री फ्रेश रकडेल’ सञ्चालनमा ल्याएका छन्, जसको उद्घाटन न्यू साउथ वेल्सका प्रिमियरद्वारा गरिएको थियो ।

न्यू साउथ वेल्स राज्यबाट एकै वर्षमा तीन पुरस्कार प्राप्त गर्ने पहिलो नेपाली मूलका व्यक्ति बनेका उनको काम त्यहाँको राष्ट्रिय मिडिया ‘द लिडर’मा समेत फिचर भएको छ । व्यवसायसँगै सामाजिक उत्तरदायित्वलाई प्राथमिकता दिँदै आएका म्याक्स बाबु ‘भिजन फर मोटिभेसन’ नामक गैर–नाफामूलक संस्थाका संस्थापकसमेत हुन्, जसले नेपाली अन्तर्राष्ट्रिय विद्यार्थीहरूको हितमा विविध सचेतनामूलक कार्यक्रम सञ्चालन गर्दै आएको छ ।

म्याक्स बाबुको यात्रा संगीत र अभिनयमा मात्र सीमित छैन । उद्यमशीलता र कलाकारितालाई सन्तुलित रूपमा अघि बढाउँदै आएका उनी व्यावसायिक सफलतासँगै सांस्कृतिक पहिचान जोगाउने अभियन्ताका रूपमा पनि चिनिन्छन् । मञ्चमा होस् वा व्यवसायमा, उनको प्रस्तुतिमा आत्मविश्वास, मिहिनेत र नेपालीपनको स्पष्ट झल्को देखिन्छ, जसले उनलाई उद्यमी–कलाकारको प्रेरणादायी पहिचान दिलाएको छ ।

भिडियो