मोटरसाइकल चोरीमा संलग्न एक आरोपीको विगत खोतल्दा उनले यसअघि पनि ८ पटक मुद्दा खेपेको तथ्य खुलेको छ ।

काठमाडौं उपत्यका अपराध अनुसन्धान कार्यालयले काठमाडौंको तीनकुने र सिनामंगलबाट चोरी भएका दुई मोटसाइकल खोजी गर्दा दोलखाका अब्राहम थामी र गोविन थामी पक्राउ परेका थिए ।

अब्रामहमविरुद्ध २०७६ यता प्रहरीका विभिन्न युनिटमा ८ मुद्दा चलेको पाइएको छ । 

अब्रामहविरुद्ध २०७६ असोज ५ मा बानेश्वर वृत्तमा चोरी तथा डाँका मुद्दा, सोही वर्ष पुस २ मा जिल्ला प्रहरी कार्यालय सिन्धुपाल्चोकमा अभद्र व्यवहार मुद्दा, पुस १४ र पुस २९ मा प्रहरी वृत्त जनसेवा र सिंहदरबारमा चोरी मुद्दा, २०७७ साउन १, मंसिर २६ र पुस ६ मा प्रहरी वृत्तहरू क्रमश: बौद्ध, सिंहदरबार र महाराजगञ्जमा चोरी मुद्दा र २०८० चैत १५ मा जिल्ला प्रहरी कार्यालय दोलखामा सवारी ज्यान मुद्दा दर्ता भएको प्रहरी अभिलेखबाट खुलेको छ । 

अनुसन्धान कार्यालयका एसपी मनोहर भट्टका अनुसार अब्रामह र गोविनलाई थप अनुसन्धानका लागि जिल्ला प्रहरी परिसर काठमाडौंमा बुझाइएको छ ।