पोखरामा जारी एनसेल टाइगर कप महिला तथा पुरुष भलिबल प्रतियोगिताको दोस्रो दिन शनिबार खेलिएको महिलातर्फको पहिलो खेलमा नेपाल पुलिस क्लब विजयी भएको छ ।

नेपाल पुलिस क्लबले अर्को विभागीय टोली त्रिभुवन आर्मी क्लबलाई ३–१ सेटमा पराजित गरेको हो । पहिलो सेटमा पराजित भएको पुलिस क्लबले खेलमा उत्कृष्ट पुनरागमन गरेको थियो ।

पहिलो सेटको नतिजालाई आर्मी क्लबले २५–१६ अंकले आफ्नो पक्षमा पारेको थियो । त्यसपछि खेलमा फर्किएको पुलिस क्लबले लगातार तीन सेट जितेको थियो ।

पुलिस क्लबले दोस्रो सेटको नतिजालाई २५–१७ अंकले आफ्नो पक्षमा पार्‍यो । पुलिस क्लब तेस्रो सेटमा २५–२२ र चौथो सेटमा २५–१३ अंकले विजयी भयो ।

त्यसअघि, प्रतियोगिताको पहिलो दिन शुक्रबार पोखरा रंगशालाको भलिबल कोर्टमा खेलिएको महिलातर्फको खेलमा टिप टप न्यु डायमण्ड स्पोर्ट्स क्लब विजयी भएको थियो ।

टिप टप न्यु डायमण्ड स्पोर्टस क्लबले त्रिभुवन आर्मी क्लबलाई २५–१३, २६–१६ र २५–८ अंकले हराएको थियो ।

प्रतियोगिताको महिलातर्फ पाँच र पुरुषतर्फ ६ टोलीको सहभागिता रहेको छ । महिलातर्फ न्यु डायमण्ड, आर्मी, नेपाल पुलिस क्लब, एपीएफ क्लब र थाइल्याण्ड क्विन्स सहभागी छन् ।

पुरुषतर्फ नेपाल पुलिस क्लब, त्रिभुवन आर्मी क्लब, एपीएफ क्लब, गण्डकी प्रदेश भलिबल संघ, पर्वत जिल्ला भलिबल संघ र माल्दिभ्सको टोली सहभागी छन् ।