टीकापुर साहित्य महोत्सवको तेस्रो संस्करण आउँदो चैत १३ देखि १५ गतेसम्म हुने भएको छ । 

स्थापनाकालदेखि नै ‘साहित्यमार्फत् सामाजिक सद्‌भाव’को नारा बोकेको टीकापुर साहित्य समाजले तेस्रो संस्करणको घोषणा गरेको हो ।

शनिबार पत्रकार सम्मेलनमार्फत त्रिदिवसीय साहित्य महोत्सवको मिति र समयतालिका सार्वजनिक गरिएको महोत्सवका संस्थापक संयोजक साहित्यकार महेशविक्रम शाहले जानकारी दिए ।

महोत्सवको तेस्रो संस्करण ‘थारू साहित्य तथा सांस्कृतिक उत्सव’ विशेष हुनेछ । जम्मा २१ बहस सत्र रहने महोत्सवमा प्रत्येक दिन सात बहस सत्र सञ्चालन हुनेछन् । हरेक बहस सत्र १/१ घण्टाको हुने शाहले बताए । 

महोत्सव चैत १३ गते भाषाविद् तथा नेपाली र अन्य ६० भाषाका वर्णमालाका निर्माता माधवप्रसाद पोखरेलको ‘हाम्रो जाति, भाषा र संस्कृति’ शीर्षकमा विद्वत प्रवचनबाट आरम्भ हुनेछ।

विशेषगरी नेपालमा कैलाली, कञ्चनपुर, बाँके, बर्दिया र दाङ (देउखुरी)मा थारू समुदायको बाहूल्य छ । थारू भाषा, थारू लोक साहित्य तथा संस्कृति नेपालको विशिष्ट मौलिक सांस्कृतिक परम्परा र पहिचान भएकोले महोत्सवले यसको संरक्षण, संवर्द्धन र प्रवर्द्धन गर्ने उद्देश्यर लिएको संयोजक शाहले जानकारी दिए । 

‘हाम्रा रैथाने भाषा र मौलिक संस्कृतिलाई समुदायको पहिचान र गौरवका रुपमा विकास गर्दै भावी पुस्ताका लागि जोगाएर राख्न र यसको गरिमा र महत्त्वलाई नयाँ पुस्तासम्म पुस्तान्तरण गर्न साहित्य तथा सांस्कृतिक महोत्सवहरू महत्त्वपूर्ण माध्यम हुन्,’ संयोजक शाहको भनाइ छ ।

यसबाहेक महोत्सवमा भाषा, साहित्य, कला, संस्कृति, शिक्षा, समाज, राजनीति, विकासलगायत विधाका अध्येता, विज्ञ, अभियन्ता, शोधार्थी र आम नागरिकहरूबीच छलफल हुनेछन् ।

महोत्सवको महत्त्वपूर्ण कार्यक्रमका रूपमा सुदूरपश्चिम प्रदेशका सर्जकका लागि सुदूरपश्चिम कविता महोत्सव रहने छ।

कविता महोत्सवमा प्रथम हुने कवितालाई १५ हजार‚ द्वितीयलाई १० हजार र तृतीयलाई पाँच हजार रूपैयाँ  पुरस्कार र प्रमाणपत्र प्रदान गरिनेछ । 

सान्त्वनास्वरूप दुईजनालाई प्रमाणपत्र प्रदान गरिने छ । महोत्सवमा सहभागी उत्कृष्ट कविताहरूको सङ्ग्रह पनि प्रकाशन गरिने आयोजकले जनाएको छ ।

अतिथि आगमनको दिन सहभागीहरूलाई महोत्सवको नारा ‘उडेर, गुडेर, तैरिएर टीकापुर’लाई सार्थकता दिन र टीकापुर भेगको पर्यटन प्रवर्द्धन गर्न कर्णाली नदीमा जलविहार गराइने छ ।

त्यहीँ साँझ थारू संस्कृतिको प्रवर्द्धन गर्ने हेतुले ‘थारू सांस्कृतिक साँझ’ आयोजन गरिनेछ । महोत्सव अवधिभर पुस्तक प्रदर्शनीसमेत हुनेछ । टीकापुर साहित्य समाजले हरेक वर्ष साहित्य महोत्सव गर्दै आएको छ ।