प्रोटिन हाम्रो शरीरका लागि अत्यन्तै आवश्यक पोषक तत्त्व हो । यो एमिनो एसिडबाट बनेको हुन्छ, जसले शरीरका कोषिका र टिस्युहरू निर्माण तथा मर्मत गर्न मद्दत गर्छ । 

प्रोटिनले हड्डीलाई मजबुत बनाउनुका साथै आवश्यक पर्दा शरीरलाई ऊर्जा पनि प्रदान गर्छ । धेरै मानिसहरू प्रोटिन केवल मासु, अण्डा वा दूधजन्य पदार्थबाट मात्र पाइन्छ भन्ने मान्यता राख्छन्, तर वास्तविकता भने यस्तो होइन ।

हाम्रो घरमै पाइने साना–साना बीउहरू पनि प्रोटिनका उत्कृष्ट स्रोत हुन् । तीमध्ये केही बीउहरू यति प्रोटिनयुक्त हुन्छन् कि तिनको प्रोटिन मात्रा अण्डासँग तुलना गर्न सकिन्छ । एउटा अण्डामा करिब ६ देखि ७ ग्राम प्रोटिन हुन्छ । 

यी हुन् प्रोटिनले भरिपूर्ण बीउ 

हेम्प सिड्स (भाङका बीउ)
हेम्प सिड्स अर्थात् भाङका बीउ साना देखिए पनि पोषक तत्त्वले भरिपूर्ण हुन्छन् । केवल ३ चम्चा हेम्प सिड्सबाट करिब १० ग्राम प्रोटिन प्राप्त हुन्छ । यसमा शरीरका लागि आवश्यक सबै ९ वटा एमिनो एसिड पाइने भएकाले यसलाई कम्प्लिट प्रोटिन मानिन्छ । साथै, यसमा ओमेगा–३ फ्याटी एसिड र म्याग्नेसियम पनि हुन्छ । हेम्प सिड्सलाई सलाद, सूप, स्मूदी वा दलियामा छर्केर सजिलै खान सकिन्छ ।

पम्पकिन सिड्स (कद्दूका बीउ)
पम्पकिन सिड्स अर्थात् कद्दूका बीउ प्लान्ट–बेस्ड प्रोटिनका उत्कृष्ट स्रोत हुन् । २८ ग्राम पम्पकिन सिड्समा करिब ७ ग्राम प्रोटिन पाइन्छ । यसका साथै यी म्याग्नेसियम र जिंकका पनि राम्रो स्रोत हुन् । पम्पकिन सिड्सलाई स्न्याक्सका रूपमा वा सलाद र सूपमा मिसाएर खान सकिन्छ ।

सनफ्लावर सिड्स (सूर्यमुखीका बीउ)
सनफ्लावर सिड्स अर्थात् सूर्यमुखीका बीउ स्वास्थ्यका लागि लाभदायक स्न्याक्स मानिन्छन् । २८ ग्राम सनफ्लावर सिड्समा करिब ६ ग्राम प्रोटिन हुन्छ । यसमा भिटामिन ई र म्याग्नेसियम प्रशस्त मात्रामा पाइन्छ, जसले शरीरका कोषिकालाई सुरक्षित राख्न मद्दत गर्छ । यी बीउलाई काँचै वा हल्का भुटेर खान सकिन्छ ।

डिस्क्लेमर  यो सामग्री केवल जानकारीका लागि मात्र हो । आफ्नो आहारमा कुनै पनि प्रकारको परिवर्तन गर्नुअघि चिकित्सक वा पोषणविद्को सल्लाह अवश्य लिनुहोस् ।