०९ असार २०८३, मंगलबार
४५ वर्षअघि १०० रुपैयाँ बराबरको गहुँ चोरीको मुद्दामा एक वृद्ध पक्राउ परेका छन् । सन् १९८० मा भएको गहुँ चोरी घटनासँग सम्बन्धित मुद्दामा ६५ वर्षीय सलीम मेवातीलाई प्रहरीले पक्राउ गरेको हो । उनलाई शनिबार (फेब्रुअरी ७) पक्राउ गरिएको प्रहरीले जनाएको छ। घटना भारतको मध्य प्रदेशस्थित खरगोन जिल्लास्थित बाल्कवाराको हो ।
प्रहरीका अनुसार सलीममाथि १९८० डिसेम्बरमा अन्य छ जनासँग मिलेर दुई फरक खेतबाट करिब १०० रुपैयाँ बराबरको गहुँ चोरी गरेको आरोप छ। घटनापछि माणिकचन्द पटेल र लालचन्द पटेलले छुट्टाछुट्टै एफआईआर दर्ता गराएका थिए ।
उपविभागीय प्रहरी अधिकारी श्वेता शुक्लाका अनुसार उक्त मुद्दा पुराना फाइल डिजिटलाइज गर्ने क्रममा सक्रिय भएको थियो । अदालतबाट जारी स्थायी वारेन्ट कार्यान्वयन गर्ने क्रममा फरार अभियुक्तहरूको खोजी गर्दा सलीमको पहिचान खुलेको बीबीसीले जनाएको छ । यसअघि सात अभियुक्तमध्ये दुई जनाको मृत्यु भइसकेको, चार जना जमानतमा छुटेको र सलीम अन्तिम बाँकी अभियुक्त रहेको प्रहरीले जनाएको छ।
पक्राउपछि सलीमलाई भारतीय दण्ड संहिता (आईपीसी) को धारा ३७९ अन्तर्गत कारबाही अघि बढाइएको थियो । तर दुवै पक्षबीच समझदारी भएपछि मुद्दा मिलापत्रमार्फत टुंगिएको बताइएको छ।
घटनाको समयमा सलिमको उमेर १९-२० वर्ष रहेको प्रहरीको रेकर्ड गरेको छ, जबकि परिवारले सलिमको जन्म १९६७ मा भएको र घटनाको समयमा किशोरावस्थामा रहेको दाबी गरेको छ ।
सलीम मूल रूपमा खरगोन जिल्लाको बाल्समुन्ड काङ्कड नामक गाउँका हुन्। विवाहपछि उनी आफ्नो ससुरालको घरबाट लगभग ७०-८० किलोमिटर टाढा धार जिल्लाको बाग गाउँमा सरेका थिए । यद्यपि, सलीमका अन्य आफन्तहरू अझै पनि बाल्समुन्ड काङ्कडमा बस्छन् ।
