२२ असार २०८३, सोमबार
तेहरानले वाशिङ्गटनसँग भविष्यको वार्ताको रूपरेखा तयार गरिरहेको इरानका उच्च कूटनीतिज्ञ अब्बास अराघचीले बुधबार संयुक्त राष्ट्रसङ्घको आणविक निगरानी संस्थासँगको टेलिफोन वार्ताका क्रममा बताएका छन्।
इरानको विदेश मन्त्रालयले जारी गरेको विज्ञप्तिमा भनिएको छ, “आइएइएका प्रमुख राफेल ग्रोसीसँगको कुराकानीमा अराघचीले भविष्यको वार्तालाई अगाडि बढाउनका लागि प्रारम्भिक र सुसङ्गत ढाँचाको मस्यौदा तयार गर्नमा इरानको ध्यान केन्द्रित गर्न जोड दिएका छन्।”
जेनेभामा इरान र संयुक्तराज्य अमेरिकाबीच ओमानको मध्यस्थतामा भएको दोस्रो चरणको वार्ताको भोलिपल्ट यो फोन वार्ता भएको हो।
अराघचीले मङ्गलबार भने, “तेहरानले द्वन्द्वबाट बच्नका लागि सम्झौताका लागि ‘मार्गदर्शक सिद्धान्तहरू’ मा सहमति जनाएको छ।”
यस विषयमा अमेरिकी उपराष्ट्रपति जेडी भान्सले भने, “तेहरानले वाशिङ्गटनका सबै ‘सीमा सर्त’ अझै स्वीकार गरेको छैन।”
अमेरिकी ऊर्जा मन्त्री क्रिस राइटले पनि बुधबार वाशिङ्गटनले तेहरानलाई ‘कुनै न कुनै तरिकाले’ आणविक हतियार प्राप्त गर्नबाट रोक्ने बताएका छन्।
भियनामा रहेको इरानी नियोगका अनुसार बुधबार भियनामा आइएइएका लागि इरानका स्थायी प्रतिनिधि रेजा नजाफीले ग्रोसी र मित्र राष्ट्र चीन र रुसका राजदूतसँग संयुक्त बैठक गरी एजेन्सीको बोर्ड अफ गभर्नरको आगामी बैठक र इरानको आणविक कार्यक्रमसँग सम्बन्धित घटनाक्रमबारे विचार आदानप्रदान गरेका छन्।
तेहरानले आइएइएसँगको केही सहयोग निलम्बन गरेको छ र वाचडगका निरीक्षकलाई जुनमा १२ दिने युद्धका क्रममा इजरायल र संयुक्त राज्य अमेरिकाले बमबारी गरेको स्थलमा पुग्न प्रतिबन्ध लगाएको छ। संयुक्त राष्ट्र सङ्घीय निकायले इरानमाथि भएको आक्रमणबारे पूर्वाग्रही बनेको र आक्रमणको निन्दा नगरेको आरोप इरानले लगाएको छ।
हालैका हप्तामा यस क्षेत्रमा वाशिङ्गटनको सैन्य तयारी बढिरहेकै अवस्थामा इरानमा अमेरिकी सैन्य हस्तक्षेपको सम्भावना रोक्न कूटनीतिक प्रयास जारी छन्।
