२९ जेठ २०८३, शुक्रबार
मध्यपूर्वमा विकसित पछिल्लो विश्व राजनीतिक घटनाक्रमको प्रभाव यसै वर्ष आयोजना हुने फिफा विश्वकप फुटबलमा पनि पर्ने देखिएको छ ।
शनिबार अमेरिका र इजरायलले इरानमाथि आक्रमण गरेको थियो । आक्रमणमा परी इरानका सर्वोच्च नेता आयतोल्लाह अली खामेनीको निधन भएको थियो ।
अहिले पनि दुवै पक्षले एक–अर्कामाथि निरन्तर आक्रमण गरिरहेका छन् । परिणामस्वरूप मध्यपूर्व अशान्त बनेको छ ।
त्यसको प्रभाव विश्वकप फुटबलमा पनि पर्ने देखिएको छ । विश्वकप फुटबल आगामी जुन ११ देखि जुलाई १९ तारिखसम्म अमेरिका, मेक्सिको र क्यानडामा संयुक्त रूपमा आयोजना हुँदैछ ।
एसियाली क्षेत्रबाट इरान यसअघि नै विश्वकपमा छनोट भइसकेको छ । आगामी विश्वकपको प्रारम्भिक चरणमा इरानको तीनवटै खेल अमेरिकामै परेको छ ।
विश्वकपमा इरान समूह ‘जी’ मा परेको छ । उक्त समूहमा इजिप्ट, बेल्जियम र न्युजिल्यान्ड पनि छन् । इरानले पहिलो खेल जुन १५ तारिखमा न्युजिल्यान्डसँग लस एन्जल्समा खेल्नेछ ।
यसैगरी, इरानले आफ्नो दोस्रो खेल जुन २१ तारिखमा सोही स्थानमा बेल्जियमसँग खेल्नेछ । इरानले तेस्रो खेल जुन २६ तारिखमा इजिप्टसँग अमेरिकाकै सियाटलमा खेल्नेछ ।
इरान फुटबल महासंघका अध्यक्ष मेहदी ताजका अनुसार, पछिल्लो घटनाक्रमपछि इरानले आगामी विश्वकपमा सहभागिता जनाउने सम्भावना निकै कम छ ।
‘अब इरानले विश्वकप खेल्ने सम्भावना निकै कम छ,’ उनले भनेका छन् । ट्रम्प प्रशासनले इरानी फुटबल समर्थकमाथि यसअघि नै अमेरिका प्रवेशमा रोक लगाइसकेको छ ।
