वैदेशिक रोजगारीका लागि विभिन्न देश पठाइदिने भन्दै ठगी गरेको आरोपमा तीन जना पक्राउ परेका छन् ।

काठमाडौं उपत्यका अपराध अनुसन्धान कार्यालयका अनुसार बेरोजगार युवायुवतीलाई आकर्षक तलबको प्रलोभन देखाउँदै विभिन्न देशमा पठाइदिने भन्दै लामो समयसम्म झुक्याएर विदेश नपठाइ सम्पर्कविहीन भएको उजुरीका आधारमा उनीहरू पक्राउ परेका हुन् ।

पक्राउ पर्नेमा चितवन भरतपुर महानगरपालिका–१५ स्थायी घर भई हाल काठमाडौं महानगरपालिका–१५ बस्ने ४९ वर्षीया कमला देवी सुनुवार छन् । उनले क्रोएशिया पठाइदिने भन्दै दुई जनाबाट चार लाख ५० हजार रूपैयाँ ठगी गरेको आरोप छ ।

यसैगरी, सिन्धुलीको कमलामाई नगरपालिका–७ स्थायी घर भई हाल काठमाडौंको बूढानीलकण्ठ नगरपालिका–४ बस्ने २९ वर्षीया सविना खड्का पनि पक्राउ परेकी छन् । उनले अमेरिका पठाइदिने भन्दै एक जनाबाट एक लाख रूपैयाँ ठगी गरेको आरोप प्रहरीले जनाएको छ ।

काठमाडौं दक्षिणकाली नगरपालिका–९ स्थायी घर भई हाल टोखा नगरपालिका–११ बस्ने ४१ वर्षीय अम्बर गुरुङलाई पनि पक्राउ गरिएको छ । उनले क्रोएशिया पठाइदिने भन्दै एक जनाबाट ५० हजार रूपैयाँ लिएको आरोप छ ।

उनीहरूलाई काठमाडौंका विभिन्न स्थानबाट पक्राउ गरी थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको अपराध अनुसन्धान कार्यालयका एसपी मनोहर प्रसाद भट्टले जानकारी दिए ।