पछिल्ला केही घण्टाहरूमा खाडी क्षेत्रका प्रमुख राष्ट्रहरूमाथि शृङ्खलाबद्ध मिसाइल र ड्रोन आक्रमण भएका छन्।

 संयुक्त अरब इमिरेट्स (युएई), कुवेत, साउदी अरब र बहराइनले आफ्नो क्षेत्रमा हवाई आक्रमण भएको पुष्टि गर्दै उच्च सतर्कता अपनाउन आफ्ना नागरिकहरूलाई आग्रह गरेका छन्।

संयुक्त अरब इमिरेट्सको रक्षा मन्त्रालयले इरानबाट भइरहेका सुरक्षा खतराहरूको सामना गरिरहेको जनाएको छ। मन्त्रालयले हवाई रक्षा प्रणाली  सक्रिय रहेकाले आकाशमा विष्फोटको आवाज सुनिन सक्ने भन्दै नागरिकहरूलाई नआत्तिन र सतर्क रहन सूचित गरेको छ।

साउदी अरबको रक्षा मन्त्रालयले मुलुकको पूर्वी क्षेत्रमा थप पाँचवटा ड्रोनहरूलाई सफलतापूर्वक रोकेर नष्ट गरेको जानकारी दिएको छ। साउदीले आफ्नो सार्वभौमसत्ता र सुरक्षाका लागि हवाई प्रतिरक्षा प्रणाली पूर्ण रूपमा परिचालन गरिएको जनाएको छ।

बहराइनमा आक्रमणको चेतावनी दिने साइरनहरू बजेसँगै आन्तरिक मामिला मन्त्रालयले बासिन्दाहरूलाई नजिकैको सुरक्षित स्थानमा जान निर्देशन दिएको थियो। पछि सरकारी अधिकारीहरूले यसलाई इरानी आक्रामकताको संज्ञा दिँदै आक्रमणको क्रममा झरेको छर्राका कारण एउटा गोदाममा आगलागी भएको पुष्टि गरेका छन्।

कुवेत सरकारले पनि आफ्नो हवाई रक्षा प्रणाली सक्रिय भएको जानकारी दिँदै विष्फोटको आवाज आउन सक्ने भएकाले नागरिकहरूलाई अधिकारीहरूले जारी गरेका सुरक्षा निर्देशनहरू पालना गर्न आग्रह गरेको छ।