१३ असार २०८३, शनिबार
अमेरिका र इरानबीच भएको शान्ति सम्झौतापछि अन्तरराष्ट्रिय बजारमा कच्चा तेलको मूल्य तीन महिनायताकै न्यून स्तरमा झरेको छ।
स्ट्रेट अफ हर्मुज पुनःसञ्चालनमा आउने अपेक्षासँगै अन्तरराष्ट्रिय बेन्चमार्क ब्रेन्ट कच्चा तेलको मूल्य चार प्रतिशतले घटेर प्रतिव्यारेल ७९.८७ डलरमा पुगेको छ। तीन महिनापछि पहिलो पटक ब्रेन्ट तेलको मूल्य ८० डलरभन्दा तल झरेको हो।
यस्तै, अमेरिकी सूचक वेस्ट टेक्सास इन्टरमिडिएट (डब्लुटीआई) कच्चा तेलको मूल्य ४.५ प्रतिशतले घटेर प्रतिव्यारेल ७७.१६ डलरमा कायम भएको छ।
अमेरिकी राष्ट्रपति डोनाल्ड ट्रम्पले स्विट्जरल्यान्डमा अमेरिका र इरानबीच शान्ति सम्झौतामा हस्ताक्षर भएपछि स्ट्रेट अफ हर्मुज पूर्ण रूपमा खुल्ने बताएका छन्।
विश्लेषकहरूका अनुसार विश्वको महत्वपूर्ण ऊर्जा आपूर्ति मार्ग मानिने स्ट्रेट अफ हर्मुज पुनःखुल्ने सम्भावनाले आपूर्ति अवरोधको चिन्ता कम गरेको छ, जसका कारण तेलको मूल्यमा गिरावट आएको हो।
