२५ जेठ २०८३, सोमबार
प्रधानमन्त्री बालेन्द्र शाह(बालेन)ले पहिलो क्याबिनेट बैठकमा मन्त्रीहरूलाई कडा निर्देशन दिएका छन् ।
प्रधानमन्त्री तथा मन्त्रिपरिषद् कार्यालय सिंहदरबारमा शुक्रबार बसेको पहिलो बैठकमा उनले काम गर्न नसके मन्त्रीहरूले राजीनामा दिनुपर्ने बताएका हुन् ।
बालेनले द्रुत गतिमा काम गर्न निर्देशन दिएको बैठकमा सहभागी एक मन्त्रीले लोकान्तरलाई बताए ।
‘रास्वपा र मन्त्रीहरूको काम गर्ने स्पीड बढी हुन्छ‚’ बालेनको भनाई उद्धृत गर्दै ती मन्त्रीले भने‚ ‘मलाई आशा छ, तपाईंहरूले काम गर्न सक्नुहुन्छ । यदि गर्न सकिन्न भन्ने लाग्छ भने राजीनामा दिनू, अर्को मान्छे आउँछ।’
बालेनले सबै मन्त्रीहरू लोकसेवा पास गरेसरह रहेकाले अब्बल भएको भन्दै प्रशंसा समेत गरेको ती मन्त्रीले जानकारी दिए ।
सो क्रममा प्रधानमन्त्री बालेनले मज्जाले काम गर्न र जनसेवा तथा नागरिक सर्वोच्चतालाई आधार मान्न निर्देशन दिएका थिए ।
बालेनको भनाइ उद्धृत गर्दै ती मन्त्रीले दिएको जानकारीअनुसार मन्त्रीहरूलाई निर्देशन दिँदै कानूनी बाधा र अड्चन देखाएर काम रोक्ने गल्ती नगर्न भनेका थिए ।
साथै, बालेनले गलत निर्देशन कसैको नमान्न र सही काम कुनै पनि हालतमा नरोक्न निर्देशन दिएको पनि उनले बताए ।
‘गलत निर्देशन कसैको पनि नमान्नू, कानूनलाई बाधा देखाएर काम भएन नभन्नू‚’ बालेनको निर्देशन उद्धृत गर्दै ती मन्त्रीले भने ।
काम गर्ने क्रममा कुनै कानूनले बाधा पुर्याए दुईतिहाइ आफूहरूसँग रहेको र तुरुन्तै कानूनी सुधार गर्ने भन्दै बालेनले कानूनी अड्चन देखाएर काम नअड्काउन निर्देशन दिएका थिए ।
‘अन्तिममा उहाँले नेपाल हाँसेको हेर्न पाऊँ भन्नुभयो‚’ ती मन्त्रीले लोकान्तरसँग भने ।
हेर्नुहोस्, भिडियो :
