मध्यपूर्वमा जारी चरम तनावका बीच इजरायलले इरानका महत्वपूर्ण आणविक र औद्योगिक केन्द्रहरूमा शक्तिशाली हवाई हमला गरेको छ। जवाफमा इरानले साउदी अरबस्थित अमेरिकी सैन्य बेसमा आक्रमण गर्दा १० जना अमेरिकी सैनिक घाइते भएका छन्। युद्धको यो भयावह स्थितिमा पनि अमेरिकी राष्ट्रपति डोनाल्ड ट्रम्पका विशेष दूतले यसै साता इरानसँग निर्णायक वार्ता हुनसक्ने आशा व्यक्त गरेका छन्।
इजरायली सेनाले इरानको मध्य भागमा रहेको 'अराक' भारी जल संयन्त्र र बुशहर आणविक पावर प्लान्टमा बमबारी गरेको छ। इरानी विदेशमन्त्री अब्बास अराघचीका अनुसार इजरायलले नागरिक बस्ती, दुई ठूला स्टिल कारखाना र पावर प्लान्टहरूलाई पनि निशाना बनाएको छ।

 अराघचीले इजरायलको यो कदमले राष्ट्रपति ट्रम्पले कूटनीतिका लागि दिएको थप समयको उल्लंघन गरेको बताउँदै इरानले यसको 'ठूलो मूल्य' असुल गर्ने चेतावनी दिएका छन्। यद्यपि, आणविक केन्द्रहरूमा हालसम्म कुनै विकिरण चुहावट वा मानवीय क्षतिको विवरण प्राप्त नभएको इरानी परमाणु ऊर्जा संगठनले जनाएको छ।

यसैबीच, साउदी अरबको 'प्रिन्स सुल्तान एयरबेस' मा इरानले गरेको मिसाइल र ड्रोन आक्रमणमा १० जना अमेरिकी सैनिक घाइते भएका छन्। अमेरिकी सञ्चार माध्यम सिबिएस न्युजका अनुसार घाइतेमध्ये दुई जनाको अवस्था गम्भीर छ भने अन्य आठ जना गम्भीर घाइते छन्। क्षेत्रीय तनाव थप बढ्दै जाँदा कुवेत र संयुक्त अरब इमिरेट्सले पनि आफ्नो आकाशमा इरानी ड्रोन र ब्यालिस्टिक मिसाइलहरू खसालेको दाबी गरेका छन्। कुवेतको मुख्य व्यापारिक बन्दरगाह शुवाइखमा समेत आक्रमणबाट क्षति पुगेको छ।