नेकपा एमालेले भदौ २३–२४ को घटना छानबिनका लागि गठन भएको गौरीबहादुर कार्की आयोगको प्रतिवेदन खोटपूर्ण ढंगले कार्यान्वयन गर्न लागिएको भन्दै आपत्ति जनाएको छ ।

पूर्वप्रधानमन्त्री एवं नेकपा एमालेका अध्यक्ष केपी शर्मा ओली र पूर्वगृहमन्त्री रमेश लेखकको सन्दर्भमा तेस्रो नजिर लागू गर्न खोजिएको भन्दै एमालेले आपत्ति जनाएको हो ।

मंगलबार बसेको प्रतिनिधिसभा बैठकको शून्य समयमा एमाले उपाध्यक्ष गुरूप्रसाद बरालले ओली र लेखकलाई लगाउन खोजिएको मुद्दा खारेजीको माग गरेका हुन् ।

‘संविधान र विधिको शासनलाई आज देशभर उल्लंघन भइरहेको छ, यो उल्लंघन गर्ने अधिकार सरकारलाई छैन । यसअर्थमा संविधाप्रदत्त नागरिकका मौलिक अधिकार स्थापनाका लागि निर्देशन दिन अनुरोध गर्दछु’, उनले भने, ‘सुरक्षा निकायलाई अलग्गै, राष्टसेवकका सन्दर्भमा अलग्गै तर ओली र लेखको सन्दर्भमा तेस्रो नजिर स्थापना गर्न खोजिएको छ । यो खोटपूर्ण छ । यी मुद्दा खारेजजन्य छन् ।’

जेनजी आन्दोलन दबाएको आरोपमा एमाले अध्यक्ष ओली र लेखक चैत १४ गते पक्राउ परेका थिए । 

एमाले सांसदहरूले सदनमा ओलीको गिरफ्तारीको विरोध गरेका छन् ।