नेकपा एमालेका नेता सूर्य थापाले राष्ट्रिय स्वतन्त्र पार्टी (रास्वपा) का सभापति रवि लामिछानेलाई लक्षित गर्दै सामाजिक सञ्जालमा कडा कटाक्ष गरेका छन् । काठमाडौंका सुकुम्बासी बस्तीहरूमा सरकारले डोजर चलाउने तयारी गरिरहेका बेला पूर्वप्रतिवद्धता विपरीत लामिछाने मौन बसेको भन्दै थापाले आलोचना गरेका हुन् ।

चुनावका बेला रविले मतदातालाई भ्रममा पारेको र अहिले संकटका बेला चुपचाप बसेको थापाले आरोप लगाएका छन् । उनले लेखेका छन्, 'मतदाताको बुद्धि भुट्न चुपचाप घण्टी छाप, सुकुम्बासी बस्तीमा डोजर पठाएर मुखमा सिल्डछाप, लोकको शरम त मान भैरे भाइ !'

निर्वाचनको समयमा लामिछानेले सुकुम्बासीको घरटहरामा डोजर चलाउन खोजियो भने आफू आफैँ छाती थाप्न आउने र बस्ती उठ्न नदिने बाचा गरेका थिए । तर, यतिबेला सरकारले काठमाडौंको थापाथलीलगायत विभिन्न क्षेत्रमा रहेका अनधिकृत सुकुम्बासी बस्तीहरू हटाउने तयारी तीव्र पारेको छ । सरकारको यो कदमपछि सुकुम्बासीहरू त्रसित बनेका छन् भने सामाजिक सञ्जाल र राजनीतिक वृत्तमा लामिछानेको पुरानो प्रतिवद्धतालाई लिएर प्रश्न उठ्न थालेको छ ।