२८ जेठ २०८३, बिहीबार
नेपाल ‘ए’ टोलीले शुक्रबार घरेलु मैदानमा सम्पन्न दोस्रो एकदिवसीय क्रिकेटमा ओमानलाई एक सय १५ रनको विशाल अन्तरले हराएको छ ।
नेपालको जितसँगै दुई खेलको शृंखला १/१ को बराबरीमा सकिएको छ । यसअघि, शृंखलाको पहिलो खेलमा ओमानले नेपाल ‘ए’लाई हराएको थियो ।
टस हारेर पहिले ब्याटिङको निम्तो पाएको नेपाल ‘ए’ले निर्धारित ५० ओभरमा सात विकेट गुमाएर दुई सय ८४ रन बनाएको थियो ।
ठूलो विजयलक्ष्य पछ्याउँदै जवाफी ब्याटिङमा ओर्लिएको ओमानले भने ३६.३ ओभरमै अलआउट हुनुअघि एक सय ६९ रनमात्र बनाउन सक्यो ।
ओमानलाई लक्ष्यसम्म पुग्न नदिन नेपाल ‘ए’का बलरहरूले उत्कृष्ट प्रदर्शन गरे । युवराज खत्रीले तीन विकेट लिए । हेमन्त धामी, शेर मल्ल र आकाश चन्दले पनि दुई/दुई विकेट हात पारे ।
सन्तोष यादवले पनि एक/एक विकेट कुम्ल्याए । नेपाली टोलीका बलरले केवल चार रन अतिरिक्त रूपमा खर्चिएका थिए ।
ओमानका लागि मजिबर अलीले सर्वाधिक ४३ रन बनाए । ओमानका माथिल्ला चार ब्याट्सम्यान सस्तैमा पेभेलियन फर्किए । जितेन रामानन्दीले २४ र विनायक शुक्लाले २१ रन जोडे ।
त्यसअघि, नेपालका लागि तीन ब्याट्सम्यानले उत्कृष्ट अर्धशतकीय पाली खेलेका थिए । तेस्रो नम्बरमा क्रिज समाल्न आएका देव खनालले ६४ रन बनाए । उनले ९५ बलमा पाँच चौका प्रहार गरे ।
ईशान पाण्डेले पनि टोलीको खातामा ६९ रन थपे । चौथो नम्बरका ब्याट्सम्यान पाण्डेले ७८ बलमा ६ चौका प्रहार गरे । यसअघि उनले ओमानविरुद्धको पहिलो खेलमा पनि अर्धशतक बनाएका थिए ।
कुशल मल्लले पनि टोलीका लागि ५७ रनको योगदान गरे । सातौँ नम्बरमा क्रिज समाल्न आएका उनले केवल ३२ बलको सामना गरी चार छक्का र चार चौका हिर्काए ।
सन्दीप जोराले पनि टोलीको खातामा ४२ रन थपे । छैटौँ नम्बरका ब्याट्सम्यान जोराले केवल २६ बलमा तीन छक्का र तीन चौका प्रहार गरे ।
ओपनर अर्जुन कुमालले १३ र कप्तान अनिलकुमार साहले सात रन बटुले । तृतराज दास एक रन बनाउँदै आउट भए । सन्तोष यादव १५ रनमा अविजित रहे ।
नेपालले अतिरिक्त रूपमा पनि १६ रन पायो । ओमानका बलर जितेनकुमार रामानन्दीले दुई विकेट लिए । सकिल अहमद, नदिम खान, सिद्धार्थ बुक्कापतनम र वसिम अलीले एक/एक विकेट हात पारे ।
यसै साता घरेलु मैदानमा शुरू हुने आईसीसी क्रिकेट विश्वकप लिग–२ क्रिकेट शृंखलाको तयारीका क्रममा नेपाल ‘ए’ र ओमानबीच अभ्यास खेल खेलिएको हो ।
कागेश्वरी मनोहरा नगरपालिकास्थित मूलपानी क्रिकेट मैदानमै बुधबार खेलिएको पहिलो खेलमा ओमानले नेपाल ‘ए’ लाई ७० रनले हराएको थियो ।
ओमानको टोली शनिबारदेखि शुरू हुने लिग–२ शृंखलामा सहभागी हुन नेपाल आएको हो । लिग–२ शृंखलामा नेपाल र ओमानसँगै संयुक्त अरब इमिरेट्स (यूएई)को पनि सहभागिता रहने छ ।
